Төрөөбүт тыл дэкээдэтинэн, Дьокуускай куорат 26 №-дээх оскуолатын 2 «В» кылааһын оҕолоругар куйаар ситиминэн эбэҥки тылын уруога олус сэргэхтик буолла.
Бу оскуолаҕа эбэҥки тылын төрөөбүт тыл быһыытынан үөрэтэр кылаас оскуола уонна Саха сирин эбэҥкилэрин Ассоциациятын көҕүлээһиннэринэн, Дьокуускай куорат дьаһалтатын өйөбүлүнэн 2020 сыллаахха аһыллыбыта. СӨ Үөрэх министиэристибэтэ үөрэнэр босуобуйалары, «Эвэды турэн 2 класс» (ааптардар Ф.М. Леханова, М.М. Кулешова) учебниктары биэрбитэ.
Учуутал Петухова Валерия Великтоновна нэдиэлэҕэ икки чаас «Эвэды турэн» уруогу, биир чаас «Литературнай таҥивун» үөрэтэр. Оҕолорго куйаар ситиминэн «Предметыл признакилватын ичэвкэндерил турэр» уруок ыытылынна.Үөрэнээччилэр «Делэки» кырынаас туһунан аахтылар, тылбаастаатылар, учуутал ыйытыыларыгар хоруйдаатылар, билиилэрин-көрүүлэрин хаҥатыннылар. Уруокка олус көхтөөхтүк кытыннылар.
Учууталлар, СӨ эбэҥкилэр Ассоциацияларын бэрэстэбиитэллэрэ уруок бүппүтүн кэнниттэн санааларын үллэһиннилэр. Учуутал үлэтин үрдүктүк сыаналаатылар, эбии матырыйааллары туһанарга сүбэлээтилэр.
Эбэҥки тылын билбэт оҕолор икки сыл үөрэтэннэр ааҕар, тылбаастыыр, ырытар буолбуттара бэлиэтэннэ. Онон кыһаларын бүтэрэллэригэр оскуола дьаһалтатын, Хотугу төрүт олохтоох аҕыйах ахсааннаах норуоттар уопсастыбаннастарын кыһамньыларынан, саамай сүрүнэ төрөппүттэр уонна оҕолор бэйэлэрин баҕаларынан үөрэтэннэр, дириҥ билиилээх-көрүүлээх дьон буола улаатан тахсалларыгар эрэл улахан.
Анастасия Куличкина,
СӨ эбэҥкилэр Ассоциацияларын бырабылыанньатын чилиэнэ,
А.Е.Кулаковскай аатынан норуоттар доҕордоһууларын дьиэтин КМНС сүрүннүүр методиһа.
+1
+1
+1
+1
+1
+1
+1