«Тирэх» кэпэрэтиип бородууксуйата «eBay» интэриниэт-маҕаһыыҥҥа атыыланар буолла
Ааспыт сыл ахсынньытыттан «Тирэх» кэпэрэтиип оҥорон таһаарар бородууксуйата «eBay» норуоттар икки ардыларынааҕы интэриниэт-маҕаһыыҥҥа атыыланар буолла диэн «Якутия 24» телеханаал саайта иһитиннэрэр.
Кэпэрэтиип бэрэссэдээтэлэ Антонида Барашкова оҥорон таһаарар бородууксуйаҕа консервант эбиллибэт диэн кэпсиир. Саха сирин отонуттан оҥоһуллубут барыанньалар уонна сироптар Америка, Италия, Норвегия, Англия, Сингапур олохтоохторун интэриэһин тарпыттар.
«Биһиги оҥорон таһаарыыбытын Сунтаарга, чугас оройуоннарга уонна Дьокуускайга эрэ атыылыыр этибит. Онтон атыыбыт ахсаанын хайдах элбэтэбит, салгыы хайдах сайдабыт диэн толкуйдаабыппыт», — диэн Антонида Барашкова кэпсиир. Кэпэрэтиип сайдарыгар «Мой бизнес» киин көмөлөспүт. Кинилэр «Тирэххэ» Харбиҥҥа «ЭКСПО-2019» быыстапкаҕа кытталларыгар сүбэлээннэр, омук атыылаһааччыларын интэриэһиргэппиттэр.
Кэпэрэтиип Москваҕа ахсынньыга буолбут Уһук Илин күннэрин быыстапкатыгар кыттыбыт.
Оттон «eBay» маҕаһыыҥҥа сироп түөрт арааһа уонна барыанньа алта көрүҥэ атыыланар. Бу барыта нобуор быһыытынан атыыга тахсыбыт. Биир нобуор сыаната — 57 дуоллар.