Бэҕэһээ, бэс ыйын 21 күнүгэр, киэһээ 18 чаастан Намҥа өрөспүүбүлүкэтээҕи ХIII Олоҥхо ыһыаҕын сабыы сиэрэ-туома ыытылынна.
edersaas.ru
Эҥсиэли кэрэ хочотугар Олоҥхо ыһыаҕын түмүктэринэн, быһа холуйан, ыһыах бастакы күнүгэр уопсайа 20-тэн тахса тыһыынча киһи сылдьыбыта бэлиэтэннэ.
Аҥаардас, ыһыаҕы үөрүүлээхтик аһыыга 2,5 тыһыынча киһи кыттыбыт, онтон 500-тэ оҕо, оттон көрөөччүтүн ахсаана — 6 тыһыынчаттан тахса буолбут.
Уопсайа Олоҥхо ыһыаҕар 70-тан тахса тэрээһин — араас күрэхтэһиилэр, куонкурустар, кэнсиэрдэр, киэҥ култуурунай бырагыраама ыытылынна.
Олоҥхо ыһыаҕын устуоруйатыгар аан бастаан Саха тэлэбиидэнньэтинэн быһа эфир оҥоһулунна.
Киэһээ киин тырыбынаҕа тобус-толору мустубут ыһыах ыадьыттара, Прокопий Ядрихинскай-Бэдьээлэ «Дьырыбына Дьырылыатта Кыыс бухатыыр» айымньытынан Олоҥхо тыйаатыра туруорбут олоҥхо-испэктээгин астына көрдүлэр.
Өрөспүүбүлүкэтээҕи ХIII Олоҥхо ыһыаҕын үөрүүлээхтик сабыыга бочуоттаах ыалдьыттарынан РФ Бырабыыталыстыбатын бэрэссэдээтэлин солбуйааччы-РФ Бырабыыталыстыбатын Аппараатын салайааччы Константин Чуйченко, РФ экэнэмиичэскэй сайдыытын миниистирин солбуйааччы Савва Шипов, Саха Өрөспүүбүлүкэтин Ил Дархана Айсен Николаев, СӨ Бырабыыталыстыбатын бэрэссэдээтэлин солбуйааччы, Олоҥхо ыһыаҕын тэрийэр кэмитиэт бэрэссэдээтэлэ Ольга Балабкина, Ил Түмэн бэрэссэдээтэлин бастакы солбуйааччы, Олоҥхо иккис уон сылын бэлэмнээн ыытыыга Ил Дархан иһинэн Национальнай кэмитиэт бэрэссэдээтэлэ Александр Жирков, Нам улууһун Аҕа баһылыга Юрий Слепцов буоллулар, о.д.а. ыҥырыылаах үрдүк сололоох ыалдьыттар кытыннылар, тыл эттилэр.
Ытык Дуоҕа Өлүөхүмэлээтэ
Улуус Аҕа баһылыга Юрий Слепцов, Нам улууһун олохтоохторун ааттарыттан ыһыах күндү ыалдьыттарыгар бука барыларыгар истиҥ махтал тылларын эттэ уонна олоҥхону бөлөҕүнэн толоруу күрэҕин кыайыылаахтарыгар дипломнары, харчынан сертификаттары туттарда.
Ольга Балабкина мустубут дьону Олоҥхо ыһыаҕынан өссө төгүл эҕэрдэлээн, үчүгэй тэрээһин иһин махтанан туран, үгүс киһи болҕомтотун тарпыт «Эр бэрдэ» күрэх кыайыылаахтарын наҕараадалаата.
Александр Жирков, бастатан туран, Олоҥхо ыһыаҕа үрдүк таһымҥа ыытыллыбытын бэлиэтээтэ. Кини, ыһыах кэмигэр үөрүүлээхтик аһыллыбыт «Олоҥхо ыллыга» инникитин «Олоҥхо аартыга» буолуохтун, ол барыта биһигиттэн бэйэбититтэн тутулуктаах, диэтэ уонна олоҥхо күрэҕэр кыайыылаах, ситиһиилээх оҕолорго, ыччаттарга наҕараадалары туттарда.
«Ыһыах табылынна, бэртээхэй ыһыах ааһан эрэр», — диэтэ Ил Дархан Айсен Николаев уонна Нам ыалдьытымсах дьонугар-сэргэтигэр маннык үчүгэй ыһыаҕы тэрийиигэ ис сүрэхтэриттэн кыһаллан көмөлөспүттэригэр махтал тылларын эттэ. Кини, бүгүн Олоҥхо ыһыаҕын бэлиэтэ Ытык Дуоҕа, 2020 сылга Олоҥхо ыһыаҕа ыытыллар Өлүөхүмэ улууһугар алгыһынан атаарылларын биллэрэн туран, күннээх Өлүөхүмэ улууһун дэлэгээссийэтин салайан кэлбит баһылык Виктор Васильевка туттарда.
—Сахабыт сиригэр, Улуу Арассыыйаҕа, Олоҥхо ыһыаҕар — Уруй-Айхал!, — диэн тылларынан түмүктээтэ бэйэтин этиитин Айсен Сергеевич.
Олоҥхо ыһыаҕын Кылаан бирииһэ Намҥа хаалла
Бу үөрүүлээх түгэҥҥэ Ил Дархан Олоҥхо ыһыаҕын кылаан бирииһин туттарда. Ол курдук, “Сүгүрүйэбит, ытыктыыбыт, Улуу олоҥхобут!” олоҥхоһуттар өрөспүүбүлүкэтээҕи куонкурустарын кылаан кыайыылааҕынан Нам улууһунааҕы Прокопий Ядрихинскай-Бэдьээлэ аатынан Олоҥхо дьиэтин фольклорга сүрүннүүр исписэлииһэ, «Дьырылыатта» оҕо фольклорнай бөлөҕүн салайааччыта Елена Константиновна Маркова тахсан, «Колми» тэрилтэ спонсордаан туруорбут Олоҥхо ыһыаҕын Кылаан бирииһинэн – “УАЗ-Патриот” массыынанан наҕараадаланна!
Елена Маркова Нам аатырбыт олоҥхоһута Прокопий Ядрихинскай-Бэдьээлэ «Дьырыбына Дьырылыатта Кыыс Бухатыыр» олоҥхотуттан толоруутун истибит эрэ барыта биһирээтэ, хайҕаата.
Өрөспүүбүлүкэтээҕи ХIII Олоҥхо ыһыаҕын үөрүүлээхтик аһыыны уонна сабыыны Былатыан Ойуунускай аатынан Саха академическай тыйаатырын сүрүн режиссера Руслан Тараховскай туруорда, уус-уран салайааччы Андрей Борисов. Сүрүн худуоһунньук Екатерина Шапошникова, сценарийы Зоя Попова, Майя Власьева бэлэмнээтилэр. Олоҥхо ыһыаҕын тэрийэн ыытыыга Олоҥхо тыйаатырын кэлэктиибэ биир сүрүн күүс буолла.
Дьон-сэргэ үчүгэй ыһыах буолла диэн астына-дуоһуйа санаатын үллэһиннэ, ыалдьытымсах Нам улууһун олохтоохторугар истиҥник махтанна.
Олоҥхо ыһыаҕын генеральнай спонсордарынан «РусГидро» уонна «АЯМтранссервис» тэрилтэлэр буоллулар. Официальнай спонсордар — «Колми», «Якутоптторг», «Сахабулт», «Фортуна» кэнсиэр агентствота. Партнер-спонсордар — «Барҕарыы» фонда, «Копиртехсервис», «Сахатранснефтегаз» , «Анаабыр алмаастара», о.д.а.
Олоҥхо ыһыаҕын киэҥ түһүлгэлээх оһуохайа эйэҕэс Эҥсиэли хочотугар киэһээ хойукка диэри дуорайа иһилиннэ.
Татьяна Маркова, edersaas.ru
Мария ВАСИЛЬЕВА (СИА) хаартыскаҕа түһэриилэрэ.