Бу нэдиэлэ саҕаланыытыгар Нам улууһун Хатыҥ Арыы нэһилиэгин (Аппааны) олохтооҕо, сылгы иитэр бааһынай хаһаайыстыбалаах Карл Макаров уола Колялыын биэлэрин көрдүү сылдьан, Хамаҕатта нэһилиэгин Саҥа Арыытыгар ардай аһыылаах хаама сылдьарын көрбүттэрин туһунан иһитиннэриини edersaas.ru сайтпытыгар таһаарбыппыт.
Коля смартфонугар уһултарбыт видеотыгар көстөрүнэн, адьырҕа кыыл лаппа бытаарбыт, мөдөөн, чычаас эбит. Карл Михайлович сабаҕалыырынан, ыалдьыбыт эбэтэр сааҕа табыллан сээмирэн сылдьар буолуохтаах. Массыынаны уонча миэтэрэҕэ диэри чугаһатар, арыыга сылдьар сылгыларга кыһаммат, хоройон баран олорор, кулуннар чугаһаан салаабатахтар эрэ үһү. Макаровтар ол хаарыан хартыынаны өйдөөн устубакка хаалбыттарыттан кэмсинэллэр. Өссө кыһыылааҕа баар – боротуохаҕа сылгы аһата киирбит дьон быһыытынан саата суох сылдьыбыттара, оттон төлөпүөннээн ыҥырбыт табаарыстара ыттары көрөн баран, аараттан төннүбүттэрэ. “Уонча мүнүүтэ эрдэ кэлбиттэрэ буоллар, ытан ылыахтаахтар этэ”, — дэһэллэр икки чааһы быһа күөйэ сылдьыбыт дьон.
Ол сарсыныгар Намтан булт иниспиэктэрдэрэ тахсаннар, суоллаан көрбүттэр даҕаны, булбатахтар этэ. Ол-бу суола-ииһэ элбэҕэ бэрт үһү. “Бүгүн кыраһалаата, хаардаата. Онон баар буоллаҕына, сарсын суолун хайан сонордоһорго чэпчэки буолуо”, — диэбитэ сэрэдэҕэ маҥнайгы кэпсэтиибитигэр Карл Михайлович. Кини бэҕэһээ, чэппиэргэ, сылгыларын көрдүү таарыйа ол бөрө бүтэһигин тахсан барбыт сирин диэки кэрийбит эрээри, суолун көрбөтөх. “Өрүскэ суоллаабатах, үөһэ тыаҕа мырааҥҥа тахсан барбыта буолуо”, — диэн сэрэйэр. Ити курдук ойуурга бэйэтэ бултаан аһыыр кыаҕа суох буолан торҕоннообут адьырҕа Эҥсиэли хочотугар киирэ сылдьан баран, икки атахтаахтар ир суолун ирдиэхтэрин билэн тэскилээбит быһыылаах. Дьэ, аны хаһан ханна баарын биллэрэр?..
Василий НИКИФОРОВ, «Саха сирэ» хаһыат, edersaas.ru