Сүрүн Уопсастыба

«Эҥсиэли» хаһыат саҥа дьиэлэннэ

Сэтинньи 19 күнүгэр үөрүүлээх быһыыга-майгыга редакциябыт саҥа дьиэтин астыбыт. Малааһыҥҥа СӨ инновацияҕа, цифровой сайдыыга уонна инфокоммуникационнай технологияларга миниистирэ Анатолий Семенов, улуус баһылыга Юрий Слепцов кыттыыны ыллылар.

 

«Эҥсиэли» хаһыат редакцията 60-с сылларга билигин «Алмаасэргиэнбаан» уонна урукку «Намстрой» дьиэтин икки ардынан Райком, Райсовет дьиэтигэр кыбыллан олорбута.  1963 сыллаахха Райком дьиэтэ уокка былдьаммыта. Ол түмүгэр, редакция билиҥҥи «Россия почтатын» иннигэр турбут, эргэ почта мас дьиэтигэр көһөн кэлбитэ. Манна 90-с сылларга диэри үлэлээбиттэрэ.

90-с – 2000 сылларга Нам улууһун дьаһалтатын дьиэтигэр олорбуппут. 2001 сылга Заложнай уулусса 4-гэр чааһынай дьиэни хонтуора оҥостон көспүппүт. 2016 сыл ахсынньытыттан 2019 сыл сэтинньи 8 күнүгэр диэри Нотариус офиһын иккис этээһигэр үлэлээн кэллибит.

Дьэ, бу курдук, араас сылларга Нам сэлиэнньэтин араас муннуктарын кэрийэн баран, бэйэбит бас билэр дьиэлэннибит. Буолаары буолан, Нам килбэйэр киинигэр, олох оргуйар оройугар түһүлгэлээн түстүбүт. Ол курдук, автовокзал, таксилар тохтобуллара, поликлиника, административнай тэрилтэлэр редакция дьиэтин тулалыыллар. Саҥа хонтуорабыт 3 сыл кэриҥэ тутулунна. Ол курдук, тутуу 2016 сылтан саҕаламмыта. Көҥдөйүн «Уйгу» ХЭТ таһаарбыта. Салгыы дьиэ ис-тас бараанын бүтүннүү «Монолит» ХЭТ ситэрдэ.

Хаһыаппыт кылаабынай редактор-директора Владислав Касьянов дьиэ балай да уһун кэмҥэ тутуллубутун бэлиэтээтэ. Онуоха өрөспүүбүлүкэ бырабыыталыстыбатыгар, Ил Түмэн депутаттарыгар, чуолаан Алексей Еремеевкэ, Нам улууһа, Ленскэй нэһилиэк дьаһалталарыгар көмөлөрүн, өйөбүллэрин иһин улахан махталын тириэртэ. Нам улууһун баһылыга Юрий Слепцов «Эҥсиэли» хаһыакка мэлдьи суруттарарын, сытыы бөрүөлээх суруналыыстар айымньылаах үлэлэрин сыаналыырын эттэ. Инникитин хардарыта сибээстээх үлэбит-хамнаспыт өссө чиҥииригэр, бөҕөргүүрүгэр баҕа санаатын биллэрдэ.

Мантан антах «Эҥсиэли» хаһыат редакцията Ст. Платонов уулуссатын 6/1 диэн саҥа аадырыска үлэлиир.

Лена НОГОВИЦЫНА, edersaas.ru саайтка анаан

Хаартыска: СӨ инновацияҕа, цифровой сайдыыга уонна инфокоммуникационнай технологияларга министиэристибэтин саайтыттан

0
0

Добавить комментарий