Эһиилгиттэн Бүтүн аан дойдутааҕы сэлии киинэ Саха сиригэр тутуллуоҕа 

Бу туһунан СӨ Бырабыыталыстыбатын Бэрэссэдээтэ Сергей Местников ситэриилээх  былаас отчуотун кэмигэр, Саха НКИХ ханаалларынан кэпсээтэ. Киин тэрийии соруга дойдубу Арктика зонатын сайдыытын стратегиятыгар Арассыыйа Президенин ыйааҕынан бигэргэтиллэн турар.

«Бу дойдубут научнай уонна туризмҥа кыаҕын арыйарга төһүү буолуоҕа. Араас дойдуттан дьон кэлэн ханна даҕаны суох сэлии уҥуохтарын илэ харахтарынан көрүөхтэрэ. Бу хайысхаҕа ыытар чинчийиилэрбитигэр аан дойду билимэ барыта кыттыһыа турдаҕа», — диэтэ вице-премьер.

Манна даҕатан эттэххэ, былырыын “Хоту: туруктаах сайдыы территорията» научнай үөрэҕирии киинэ аан дойду таһымнаах итинник тэрээһиннэр куонкурустар кыайан турар. Бу бырайыак үлэлээтэҕинэ наукабыт уонна технологиябыт өссө үрдүк таһымҥа тахсыаҕа.

Аны туран өрөспүүбүлүкэбит научнай уонна технологическай сайдыытын хааччыйар судаарыстыбаннай бырагырааматыгар былырыын 357,9 мөл.солк. көрүллүбүт. Соторутааҕыта «Саха сирин история» диэн үс туомнаах кинигэ күн сирин көрдө. Комплекснай научнай чинчийии иккис түһүмэҕэ саҕаланна.

Кандидатскай уонна докторскай үлэлэрин көмүскээбит 25 учуонай бүддьүөттэн эбии харчы ылла. Оттон 30 эдэр учуонай стипендия тутта. Быйылгыттан эдэр учуонайдарга, устудьуоннарга, исписэлиистэргэ 500 тыһ. солкуобайдаах Ил Дархан уон грана олохтонно.

СӨ Ил Дарханын уонна Бырабыыталыстыбатын Пресс-сулууспата

Мария Васильева, СИА, хаартыската