Бу күн Былатыан Ойуунускай аатынан Саха академическай тыйаатырын көрөөччүлэрэ саалаҕа киириэх иннинэ, үгэс курдук, кырачаан чуораанчыгы илиилэринэн даҕайан, лыҥкынас тыаһы таһааран аастылар. Бу чуораанчыгынан өссө ХХ үйэ саҥатыгар көрөөччүнү саалаҕа ыҥыраллара.
edersaas.ru
Саха тыйаатырын мусуойун дириэктэрэ, РФ үтүөлээх артыыһа, СӨ норуодунай артыыһа, ССРС уонна Арассыыйа Судаарыстыбаннай бириэмийэлэрин лауреата, бүгүн Илиир Хоруолу оонньуохтаах Ефим Степанов ааспыт үйэ илдьитинэн буолбут чуораанчыгы күн бүгүҥҥэ диэри харайан аҕалбытыгар махтана саныы-саныы көрөөччүлэр саалаҕа муһуннулар. Ол курдук, бэс ыйын 30 күнүгэр, Андрей Борисов туруорбут, 1998 сыллаахха Арассыыйа тыйаатырын «Кыһыл көмүс мааска» уонна РФ Судаарыстыбаннай бириэмийэлэрин ылбыт «Илиир Хоруол» испэктээк тыйаатыр сезонун түмүктүүр.
СӨ култуураҕа уонна духуобунай сайдыыга миниистирэ Юрий Куприянов бэлиэтээбитин курдук, тыйаатыр сезона сабыллар күнүгэр Саха тыйаатырын чахчы астынар, таптыыр, итэҕэйэр уонна өйүүр дьон түмүктүүр испэктээги, “Илиир Хоруолу” көрөөрү кэлбит.
РФ норуодунай артыыһа, ССРС уонна РФ Судаарыстыбаннай бириэмийэлэрин лауерата Андрей Борисов эҕэрдэ тылыгар:
“Өрөспүүбүлүкэ 100 сылын бэлиэтээһин дьаһалларыттан биир сүрүннэрэ Саха тыйаатырыгар буолбутун өйдүүр буолуохтааххыт. Мин Сахам тыйаатырын артыыстара өрөспүүбүлүкэбитин төрүттэспит улуу дьоммут уобарастарын арыйан, элбэх тэрээһиҥҥэ кытталларын киэн тутта көрөбүн. Бу дьикти уонна улууканнаах көстүү. Алампа, Өксөкүлээх Өлөксөй, Былатыан Ойуунускай, Максим Аммосов, Исидор Барахов, Степан Аржаков уо.д.а. уобарастарын артыыстар итэҕэтиилээхтик арыйан көрдөрөллөр. Кинилэр куорат болуоссаттарыгар, стадионнарга, киин трибуналарга уо.д.а. таҕыстахтарына, дьон-сэргэ артыыстар нөҥүө автономияны төрүттэспит дьоммутугар сүгүрүйэр. Ол иһин, мин өссө 30-ча сыллааҕыттан, оттон билигин өссө күүскэ итэҕэйэбин: Саха тыйаатыра судаарыстыбаннас, духуобунас күүһүн тарҕатааччынан уонна ааспыт үйэни ситимнээччинэн буолар, көрөөччүнү бэйэтигэр тардар”, — диэн, Саха тыйаатырын артыыстарыгар, айар кэлэктиибигэр махтал тылларын анаата.
Андрей Саввич ону сэргэ М.Щепкин аатынан училище преподавателларыгар, нуучча тыйаатырын оскуолатыгар сүгүрүйэрин тириэрдэргэ Москваттан кэлэ сылдьар ыалдьыт Анна Гарноваттан көрдөстө. Анна Олеговна — артыыс маастарыстыбатын преподавателэ, Моссовет аатынан тыйаатыр сүрүннүүр артыыската, биһиги 5-с устуудьуйабыт ыччаттарын кытары Щепкиҥҥэ бииргэ үөрэммит.
Бүгүҥҥү долгутуулаах күн тапталлаах тыйаатырбыт артыыстара испэктээккэ оонньуу эрэ буолбакка, сыанаҕа наҕараада ыла тахсыбыттарыттан көрөөччүлэр тэҥҥэ үөрдүлэр. Ол курдук, СӨ бырабыыталыстыбатын бэрэссэдээтэлин солбуйааччы Сергей Местниковтан Махтал суруктары:
Саха тыйаатырын артыыһа, “Сарсыарда уу чуумпуга” испэктээк режиссера, СӨ култууратын туйгуна, Алампа уонна Пантелеймон Васильев ааттарынан уопсастыбаннай бириэмийэлэр лауреаттара Роман Дорофеев;
Саха тыйаатырын артыыһа, “Семинария паартатыттан автономия түрүбүүнэтигэр” испэктээк режиссер-консультана, СӨ култууратын туйгуна Илья Стручков;
Саха тыйаатырын артыыһа, “Бүтэһик малыыппа” испэктээк режиссер-консультана, СӨ үтүөлээх артыыһа Василий Борисов туттулар.
Кэлэр сезоҥҥа көрсүөххэ диэри!
Надежда ЕГОРОВА, «Саха сирэ», edersaas.ru