Мас-рестлинг норуоттар икки ардыларынааҕы федерациятын кэмпириэнсийэтин кэмигэр эһиил Саха сиригэр IV аан дойдутааҕы чөмпүйэнээт уонна ыйааһынынан абсолютнай кыайыылааҕы быһаарар чөмпүйэнээт ыытыллара былааннанарын туһунан иһитиннэрдилэр диэн СИА суруйар.
Чөмпүйэнээттэри быһа холоон Дьокуускайга бэс ыйын 23-27 күннэригэр «Өрөгөй» успуорт комплексыгар оҥорор былааннаахтар. Оттон абсолютнай күрэхтэһии финалын Туймаада ыһыаҕын кэмигэр «Үс Хатыҥҥа» ыытыахтара. Онон аан дойду чөмпүйүөннэрин үөрүүлээх быһыыга-майгыга уруйдуохтара-айхаллыахтара.
«Чөмпүйэнээттэр өрөспүүбүлүкэ төрүттэммитэ 100 сылын көрсө ыытыллаллар, онон бэлэмнэнии номнуо саҕаламмыта. Бу күннэргэ биһиги бастакыбытын аан дойдутааҕы мас-рестлинг күнүн бэлиэтиэхпит. Онно анаан өрөгөй ырыатын уонна бэлиэни толкуйдуурга куонкурус биллэрбиппит», — диэн федерация чилиэннэрэ иһитиннэрэллэр.