СӨ Тырааныспар уонна суол хаһаайыстыбатын министиэристибэтэ 2022 сылга Аартыка түөлбэтин улуустарыгар сөмөлүөтүнэн көтүүгэ субсидиялааһын саҥа мэхэньииһимин оҥорору былааннаабыт. Бу туһунан тустаах министиэристибэ салайааччыта Владимир Сивцев «Тырааныспар инфраструктуратын сайыннарыы» диэн пресс-кэмпириэнсийэҕэ иһитиннэрдэ.
«Хотугу улуустар олохтоохторугар анаан сылы эргиччи уонна сааһынан хааччахтааһына суох субсидия мэхэньииһимин толкуйдаатыбыт. Хоту улуустарга бырапыыскалаах киһи бу субсидияны туһаныаҕа. Саҥа мэхэньииһими эһиил олоххо киллэрэргэ былаанныыбыт», — диэн миниистир Владимир Сивцев кэпсээтэ.
Быһа барыллаан ааҕыынан, саҥа мэхэньииһим олоххо киирдэҕинэ, субсидиялаах авиа-көтүүнэн эбии 45 тыһ. киһи туһаныаҕа. Владимир Сивцев быһаарбытынан, тустаах этии бырабыыталыстыба көрүүтүгэр киллэриллибит.