Эһиил Ньурба театра олоххо киириэҕэ

Бөлөххө киир:

Ньурба куората күн-түүн сайдан, киэркэйэн иһэр. Бу күннэргэ РФ Судаарыстыбаннай Дууматын депутата Галина Данчикова Ньурба улууһун саҥа эбийиэктэрин көрөн барда, куорат уопсастыбаннаһын кытары көрүстэ.

Улууска биир улахан тутуунан Ньурбатааҕы судаарыстыбаннай көһө сылдьар драматическай театр киинэ буолар. Эһиил олунньуга театр саҥа дьиэҕэ көһөн киириэхтээх. Тутуу былаан быһыытынан бара турар. Галина Данчикова бэлиэтээбитинэн, бу тутуу аҥаардас Ньурба улууһугар эрэ буолбакка, бүтүн өрөспүүбүлүкэ үрдүнэн суолтата улахан. “Театр Ньурбаҕа эрэ буолбакка өрөспүүбүлүкэ улуустарыгар, оройуоннарыгар гастроллуу барарыгар кыахтаныаҕа”, – диэн этэр кини.

Хаарбах дьиэттэн дьону көһөрүү бырагырааматынан билигин улууска үгүс дьиэ тутулла турар. 2024 сылга диэри 1 млрд солкуобай көрүллэн, 30 тыһыынчаттан тахса кв м иэннээх дьиэ көһөрүллүөхтээх.

Ньурбалар икки улухан тутууга кыһалҕалар баалларын эттилэр. Ол курдук, 3000 миэстэлээх, сүүрэр манежтаах стадион уонна бассейнаах спорт комплекса тутуулара тохтоон тураллар. Галина Иннокентьевна бу икки тутууларга сыһыаран, федеральнай бырагыраамаларга киллэрэргэ үлэ барыахтааҕын бэлиэтээтэ. Манна даҕатан эттэххэ, Ил Дархан Айсен Николаев Ньурба улууһугар кэлэ сылдьан тутуулар эһиилгиттэн федеральнай бүддьүөккэ киирсэн, салгыы барыахтарын наадатын бэлиэтээн эппитэ. Спорт киинэ 1 млрд солкуобай суумалаах, бу харчыны 2023-2024 сс. федеральнай бүддьүөттэн үбүлэтэр былааннаахтар.

Галина Данчикованы кытары Ил Түмэн депутата Феодосия Габышева сырытта. Олохтоохтор икки депутакка туһаайан, туох кыһалҕалаахтарын эттилэр. Холобур, Октябрьскай нэһилиэгэр оскуола уонна оҕо саада туолан турар, онон манна эбии тутууну ыытыахха наада. Ньурба 3-с №-дээх оскуолатын дириэктэрэ Петр Кузьмин үөрэнээччилэри сылаас аһылыгынан хааччыйыыга үлэлэспитин иһин Галина Данчиковаҕа махтанан туран, бу бырайыагы өссө үрдүкү кылаас оҕолоругар киллэриэххэ наадатын бэлиэтээтэ. Ону таһынан оскуолаҕа анал медицина үлэһитэ баар буолуохтааҕын эттэ. итини сэргэ дьон-сэргэ интернет төлөбүрүн кыччатарга, “Земский доктор” бырагыраамаҕа уларытыылары киллэрэргэ туруорустулар.

Аграфена КУЗЬМИНА

+1
0
+1
0
+1
0
+1
0
+1
0
+1
0
+1
0