Эһиил Үлэ Дьоруойа Роман Константинов төрөөбүтэ 125 сыла бэлиэтэнэр
Саха Өрөспүүбүлүкэтэ кэлэр 2021 сылга сахаттан бастакынан Социалистическай Үлэ Дьоруойун үрдүк аатын ылбыт Роман Иннокентьевич Константинов төрөөбүтэ 125 сылын үрдүк таһымҥа бэлиэтииргэ былааннанар.
edersaas.ru
Роман Константинов 1896 сыллаахха алтынньы 14 күнүгэр Боотуруускай (Чурапчы) улууһун I Болугур нэһилиэгэр төрөөбүтэ. 1933 сылтан холкуоска сылгыһытынан, сылгы пиэрмэтин сэбиэдиссэйинэн үлэлээбитэ. Холкуос сылгытын ахсаана 168 % элбиирин, төрүөҕү ылыы 100 % буоларын ситиспитэ. 1947 сыллаахха 55 биэттэн 55 кулуну ылан, 1948 сыллаахха ССРС Үрдүк Сэбиэтин Президиумун ыйааҕынан, сахаттан бастакынан Социалистическай Үлэ Дьоруойа буолбута. Ленин уордьанынан иккитэ наҕараадаламмыта, Чурапчы улууһун Бочуоттаах олохтооҕо буолбута, 1949—1958 сс. Саха АССР Үрдүкү Сэбиэтин дьокутаатынан талыллыбыта. Биир дойдулаахтара кининэн киэн тутталлар. Болугур нэһилиэгин Амма орто оскуолата 2003 сылтан Роман Иннокентьевич Константинов аатын сүгэр.
Бүгүн, ол эбэтэр от ыйын 17 күнүгэр, Ил Дархан уонна Бырабыыталыстыба дьаһалтатын салайааччы Афанасий Владимиров видеокэмпириэнсибээс киэбинэн Социалистическай Үлэ Дьоруойа Роман Константинов төрөөбүтэ 125 сылын көрсөр дьаһаллары тэрийэр хамыыһыйа сүбэ мунньаҕын ыытта.
– 2021 сылга диэри Роман Иннокентьевич Константинов аата-суола үлэ киһитин өрө тутуу быһыытынан саҥалыы иһиллэрин, сылгыны иитии салаатыгар улахан болҕомто уурулларын курдук үбүлүөйдээх дьаһаллары тэрийиэхтээхпит, – диэтэ Афанасий Семенович.
Тэрийэр хамыыһыйа чилиэннэрэ Тыа хаһаайыстыбатын министиэристибэтэ уонна Чурапчы улууһун, Болугур нэһилиэгин дьаһалталара оҥорбут Социалистическай Үлэ Дьоруойа Роман Константинов төрөөбүтэ 125 сылын көрсөр үбүлүөйдээх дьаһаллар былааннарын дьүүллэстилэр. Тыа хаһаайыстыбатын миниистирэ Александр Атласов иһитиннэрбитинэн, былааҥҥа 18 дьаһал торумнаммыт, олору олоххо киллэриигэ Тыа хаһаайыстыбатын министиэристибэтэ, ОДьКХ уонна энергетика министиэристибэтэ, Култуура уонна духуобунай сайдыы министиэристибэтэ, Тырааныспар уонна суол хаһаайыстыбатын министиэристибэтэ итиэннэ Чурапчы улууһа бииргэ үлэлиэхтээхтэр.
2021 сылга өрөспүүбүлүкэтээҕи Сылгыһыт күнэ Чурапчы улууһугар Социалистическай Үлэ Дьоруойа Роман Константинов төрөөбүтэ 125 сылын чэрчитинэн ыытыллара, «Мындаҕаайы – мин кэрэ дойдум» кинигэ, Роман Константинов олоҕор-дьаһаҕар, үлэтигэр-хамнаһыгар анаммыт хаартыска альбома тахсара уонна урут тахсыбыт «Дьоруой Арамаан» кинигэ хос бэчээттэнэрэ былааннаммыт. Ону таһынан Дьоруой пааматынньыгын таһыгар искибиэр оҥоһуллуохтаах, «Сырдык» хомууна 100 сылынан пааматынньык туруоруллуохтаах, Болугур нэһилиэгин Мындаҕаайы бөһүөлэгэр тупсаран оҥорууга элбэх үлэ ыытыллыахтаах.
Сүбэ мунньах түмүгүнэн, Афанасий Владимиров Тыа хаһаайыстыбатын министиэристибэтэ кэлэр нэдиэлэ бүтүөр диэри, киирбит этиилэри учуоттаан, Былааны өссө чопчулууругар сорудахтаата диэн Ил Дархан уонна Бырабыыталыстыба дьаһалтатын пресс-сулууспата иһитиннэрэр.
Раиса Сибирякова, «Саха сирэ» edersaas.ru