Сунтаарга бу күннэргэ улуус дьаһалтатыгар бизоннары көрүүгэ-харайыыга туһаайыллыбыт сүбэ мунньах ыытылынна.
Сунтаар улууһугар быйыл саас кулун тутарга Кэмпэндээйиттэн 50 км сиргэ 10 бизону аҕалан «Тумара» бизонарий тэриллибитэ.
Сүбэ мунньахха улуус Аҕа баһылыга Анатолий Григорьев уонна туһааннаах тэрилтэлэр салайааччылара хамыыһыйа тэринэн бу экологическай бырайыакка Кэмпэндээйитээҕи Г.Е. Чолбодуков аатынан санаторий баазатыгар олоҕурбут «Сир уустара» өрөспүүбүлүкэтээҕи оҕолор дьоҕурдарын сайыннарар уонна доруобуйаларын чэбдигирдэр киини кытта инникитин улууска экотуризм хайысхата сайдарыгар комплекс тэрийиигэ үлэни ыытар туһунан кэпсэттилэр.
Инникитин бизоннар турар сирдэрин кэҥэтиигэ, үлэһиттэргэ олорор дьиэ тутуутун уонна СӨ айылҕа харыстабылын министиэристибэтин үбүлээһининэн эһиил эбии 10 бизон кэлэрин былаанныыллар.
«Сунтаар улууhа (оройуона)» муниципальнай оройуон дьаһалтатын пресс – сулууспата.