Эһиил Халыма суолун Чурапчы — Аллараа Бэстээх учаастага барыта аспаалланыа
Халыма федеральнай суолга Аллараа Бэстээхтэн Чурапчыга диэри учаастак аспаалланыаҕа. Бүгүҥҥү туругунан, Чурапчы уонна Төҥүлү икки ардыгар киэҥ далааһыннаах үлэ күөстүү оргуйар.
Ол курдук, 78-с км — 90-с км учаастакка суолу кытаатыннарыы төхнологиятынан үлэ ыытыллар. Оттон 148-с км — 163-с км учаастагы аспааллааһын барар, итини тэҥэ, суол кытыытыгар лаампалары ыйыыллар, оптуобус тохтобулларын туруораллар, тротуардары оҥороллор. Итини сэргэ, 90-с —135-с км уонна 142-с —148-с км учаастактарга өрөмүөн үлэтэ саҕаламмыт, бу үлэ 2022 сылга түмүктэниэҕэ. Ити үөһээ этиллибит үлэлэр этэҥҥэ үмүрүйдэхтэринэ, 2022 сыл бүтүүтэ Аллараа Бэстээх — Чурапчы учаастага барыта аспаалланыа.
Томпо улууһугар эмиэ тустаах үлэ күүскэ бара турар. Хаандыга уонна Теплай Ключ икки ардыгар 465-с – 470-с км учаастакка хапытаалынай өрөмүөн ыытыллар, ол курдук, үрэхтэр ууларын аһардар турбалар сытар сирдэрин бөҕөргөтүү уонна аспаалы оҥорорго аналлаах фабриканы таҥыы барар. Оттон 868-с — 879-с км учаастакка суол төрүт сүнньүн көннөрө сылдьаллар.
Итини тэҥэ, «Заячьей петляҕа» (662-с км – 692-с км) уонна «Ньаратааҕы кыбычыыҥҥа» (1121-с км — 1142-с км) уопсайа 47 км уһуннаах суолу кэҥэтии барар. Бу үлэ 2024 сылга түмүктэнэн, ити учаастактарынан айан куттала суох буолуоҕа. Онон ити этиллибит учаастактарга эппиэтинэстээх, элбэх кээмэйдээх үлэ ыытылла турарынан хас даҕаны тэрилтэ үлэлиир. Кинилэр ыарахан уйуктаах тиэхиньикэлэрэ айаннааччыларга мэһэй-таһай буолаллара чуолкай. Ол иһин Бүлүү суолун управлениетын салалтата ити баар мэһэйдэри айаннааччылар өйдүөхтэрэ диэн эрэнэр. Санатар буоллахха, былырыын балаҕан ыйыгар Халыма суолугар хапытаалынай өрөмүөн кэнниттэн 50-с – 65-с км учаастак үлэҕэ киирбитэ.
edersaas.ru