2013 сылга “Эркээни” диэн урутаан сайдар сир баар буолуоҕа. Инвестиционнай кэмитиэт мунньаҕар Ил Дархан Айсен Николаев бу бырайыагы өйөөтө уонна кылгас кэм иһигэр нуорма-быраап докумуоннарын бэлэмнээн, Ил Түмэн күһүҥҥү сессиятыгар киллэрэргэ сорудахтаата.
— “Эркээни” туһунан иһиллибитэ ыраатта, дьиҥэ, бастакы бэрэсидьиэммит Михаил Николаев “Үс хочо” бырайыагын идиэйэтэ буоллаҕа. Суол-иис уонна туристическай инфраструктурата тубустаҕына, улуус сайдар кэскиллээх. Туризмтан саҕалаан тыа хаһаайыстыбатын бородууксуйатын оҥорон таһаарыыга тиийэ боппуруостар көрүллүөхтээхтэр, — диэн Айсен Николаев бэлиэтээтэ.
Кини этэринэн, улуустарга урутаан сайдар сирдэр элбииллэрэ кэрэхсэбиллээх. Ол эрээри, бырайыак эрэ барыта федеральнай ирдэбиллэргэ кыайан сөп түбэспэт. Улахан инвестициялар, угуллубут үп эргийиитэ, элбэх үлэһит, о.д.а. наада.
Экэниэмикэ миниистирин солбуйааччы Александр Афанасьев этэринэн, “Эркээни” барыстаах өрүтэ – Дьокуускайтан чугас сытара, социальнай, инженернэй инфраструктура сайдыбыта буолар. Чугастааҕы сэлиэнньэлэр бары гаастаахтар, уокка холбонууга харгыс суох.
Улууска бу бырайыак 200-тэн аҕыйаҕа суох үлэ миэстэтин таһаарыаҕа, кыра дохуоттаах дьиэ кэргэттэр ахсааннарын 10% көҕүрэтиэҕэ, киин куоракка олохтоох бороууксуйаны элбэтиэҕэ. Онон хайа да өттүнэн барыстаах буолар.
“Эркээни” бастакы резиденнэринэн эти-үүтү оҥорон таһаарар, быраҕыллыбыт сирдэри, бааһыналары чөлүгэр түһэрэр, оҕуруот аһын үүннэрэр, харайар, барыанньалары, сироптары оҥорор, туризмы сайыннарар, о.д.а. тэрилтэлэр буолуохтарын сөп.
Ангелина Васильева, “Саха сирэ” хаһыат”, edersaas.ru
Хаартыска: sakhagov.ru