Российскай Федерация 1180 мөл. гектарга тайаан сытар ойуурун 20 %-на Саха сиригэр баар. Быйыл Россияҕа Экология сыла биллэриллэн, ойуур хаһаайыстыбатын үлэһиттэригэр улахан эппиэтинэс сүктэрилиннэ. edersaas.ru
Билигин өрөспүүбүлүкэ соҕуруу улуустарыгар, ол иһигэр Өлүөхүмэҕэ, Ленскэйгэ, Уус Маайаҕа, Алдаҥҥа ойуур маһа ситэн-хотон турар. Онон ойуур бырамыысыланнаһа бу улуустарга ордук сайдар кыахтаах. Эбиитин тимир суол ааһар буолан, бары өттүнэн барыстаах. Хомойуох иһин, кэлиҥҥи сылларга хара тыабыт уот аһылыга буолар түбэлтэтэ элбээтэ. Быйыл өрөспүүбүлүкэҕэ уопсайа 155 986,94 га иэннээх 323 ойуур баһаара тура сылдьыбыта. Тустаах сулууспалар быһааралларынан, баһаар 60 %-на этиҥтэн, 28 %-на киһи дьалаҕайыттан, уоту сэрэҕэ суох туттуутуттан, ол иһигэр табахтан, кулуһуну умуруорбакка барыыттан, өртөөһүнтэн тахсар. Быйылгы баһаардар турууларын сүрүн биричиинэтинэн айылҕа дьайыылара буоллулар. Ол курдук, өр кэмнээх кураан уонна сиэри таһынан куйаас күннэр турбуттара. Мантан аҕыйах бырыһыана киһи дьалаҕайыттан таҕыста.
Өрөспүүбүлүкэҕэ авиа-баһаарынайдар тиийбэт буоланнар, сыл ахсын федераллары ыҥыран үлэлэтэллэр. Ойуур баһаардарын умулларыыга анал үөрэҕи, бэлэмнэниини барбыт дьон аҕыйаҕа үлэни атахтыыр. Онон ыам ыйыгар Иркутскайга ыытыллыбыт сүбэ мунньахха Егор Борисов «Авиалесоохрана» ФБУ филиалын Саха сирин территориятыгар аһар туһунан РФ президенэ Владимир Путиҥҥа этии киллэрбитэ. Ил Дархан этиитин РФ бырабыыталыстыбата ылынан, 2018 сылтан Дьокуускай куоракка 65 киһилээх анал биригээдэ үлэлиэҕэ.
Анивера Акимова, «Саха сирэ» хаһыат, edersaas.ru