Сергей Зверев-Кыыл Уола аатынан Национальнай үҥкүү тыйаатыра көрөөччүлэригэр анаан, бэйэтин YouTube ханаалыгар испэктээктэрин толору уһуллууларын укта. Онон, бу киэһэттэн саҕалаан, күндү ааҕааччылар, Үҥкүү тыйаатырын бастыҥ испэктээктэрин көрөргө ыҥырабыт!
«Уруу»
Бу, саха былыргы үгэһинэн кэргэн кэпсэтии матыыптарыгар олоҕурбут Үҥкүү тыйаатырын бастакы ааптарыскай испэктээгин премьерата 1994 сыл бэс ыйын 2 күнүгэр буолбута.
Композитор — Аркадий Самойлов, либретто ааптара — Петр Колесов, режиссер, туруорааччы-хореограф – Геннадий Баишев, туруорааччы-дирижер — Николай Петров, муусука оркестровката — Афанасий Томскай, научнай консультаннар – филологическай наука кандидата А.Е. Захарова, искусствоведение кандидата А.Г. Лукина.
Испэктээккэ, икки өттүттэн кыахтаах, баай ыаллар оҕолорун холбуур уруу сиэрэ-туома көрдөрүллэр. Биллэрин курдук, хас биирдии омук сиэрин-туомун толору көрдөрүүгэ анаан үҥкүү, ырыа, алгыс уонна манна туттуллар тустаах кэпсэтии-ипсэтии киирэллэр. Манна муусука, үҥкүү, тыл уонна вокал олус табыгастаахтык дьүөрэлэһэллэр. Бу испэктээккэ саха сиэрэ-туома — «Симэх симээһин» — сүктэр кыыһы таҥыннарыы аан бастаан көрдөрүллүбүтэ. Кэргэн кэпсэтии түһүмэхтэрэ – эрдэттэн кэпсэтии, сыбааттар кэлиилэрэ, уруу күнүн-дьылын чопчулааһын, бэлэх бэрсии, күтүөт төрөппүттэринээн кэлиитэ, аал уоту айах тутуу сиэрэ-туома, уоллаах кыыска алгыс, Уруу ыһыаҕын ыһыы, кийиит кыыс күтүөт уол дьиэтигэр көһөн барыыта — барыта тутуһуллар. Испэктээк үрдүк уус-уран таһымын «Кыыс санаалара», «Уол түүлэ», «Төлкө», «Уот иччитэ» диэн интэриэһинэй сценалар хааччыйаллар.
Сэргэхсийиҥ, сэргээн көрүҥ!!!
Бэлэмнээтэ Татьяна Маркова, edersaas.ru