Өрөспүүбүлүкэҕэ коронавирус дьаҥын бохсор үлэҕэ диаспоралар көхтөөх кыттыыны ылаллар. Бу туһунан А.Е.Кулаковскай аатынан норуоттар доҕордоһууларын дьиэтин пресс-сулууспата иһитиннэрдэ.
Дойду үрдүнэн сыстыганнаах коронавирус дьаҥа тарҕанан уустук балаһыанньаны үөскэппит кэмигэр, СӨ норуоттарын Ассамблеята, национальнай-култуурунай түмсүүлэр «Эһиги соҕотох буолбатаххыт» диэн аахсыйаны тэрийдилэр. Бэйэлэрин күүстэринэн хомуйбут харчыларыгар саамай наадалаах аһы-үөлү, күн ахсын наада буолар, туттуллар малы-салы атыылаһан, социальнай гостиницаларга олорор дьоҥҥо туттардылар. Бу Ассамблея Өлүөхүмэтээҕи салаатын көхтөөх кыттааччылара, таҥастан мааскалары тигэн наадыйар дьоҥҥо түҥэттилэр. Ассамблея Алданнааҕы салаатын бэрэссэдээтэлэ Рената Хусаинова көҕүлээһининэн, гуманитарнай көмөнү түмэр уонна тарҕатар уопсастыбаннай ыстаап тэрилиннэ.
Муус устар 21 күнүгэр Абдулмубин Мамажанов бэрэссэдээтэллээх, Дилшоджон Абдуллахатов бэрэссэдээтэли солбуйааччылаах уонна урбаанньыт Батыржон Турсунбаев көҕүлээһиннэринэн, Саха сиригэр олорор узбектар дисапоралара, оҕуруот астаах, фрукталаах 500 бакыаты бэлэмнээтилэр. Бу бакыаттар волонтердар штабтарынан олохтоохторго түҥэтиллэ сылдьаллар. Бэҕэһээ, муус устар 23 күнүгэр, узбектар диаспоралара оҕуруот астаах, фрукталаах 250 бакыаты Дьокуускай куоракка сыстыганнаах ыарыыны эмтиир оҕо балыыһатын үлэһиттэригэр туттардылар.
СӨ «Узбектар дисапоралара» национальнай-култуурунай киин бэрэссэдээтэлэ Абдулмубин Мамажанов:
—Коронавирус дьаҥын тарҕаппат туһугар охсуһар уустук кэмҥэ быраастар, доруобуйа харыстабылын эйгэтин үлэһиттэрэ хайдахтаах күүс-сэниэ, өй-санаа баранар ноҕоруускатыгар сылдьалларын өйдүүбүт. Итинник уустук, эппиэтинэстээх уонна кутталлаах кэмҥэ үлэҕэ сылдьар дьон, медиктэр, билигин эмтэнэ сытар дьонтон итэҕэһэ суох өйөбүлгэ наадыйаллар эбээт. Ону өйдөөн, биһиги кинилэри бэйэбитигэр кыаллар өртүнэн, оҕуруот аһынан уонна фруктанан көмөлөһөн, өйүүргэ быһаарынныбыт. Оҕуруот аһын атыылааһынынан дьарыктанар Труд уулуссатын 4, 8 уонна Чернышевскай уулуссатын 66 №-гэр баар баазаларыттан түмүстүбүт. COVID-19 эпидемиятын бохсорго сынньанары да умнан инники күөҥҥэ үлэлии сылдьар медиктэргэ сүгүрүйэн тураммыт улахан махталбытын биллэрэбит.
Сыстыганнаах ыарыыны эмтиир оҕо балыыһатын кылаабынай бырааһын солбуйааччы Николай Тихонов:
—Биһиэхэ маннык болҕомтону ууран өйөбүл буолбуттарыгар, бу диаспора дьонугар-сэргэтигэр бука барыларыгар, улахан махталбытын тиэрдэбит. Наһаа үөрдүбүт, долгуйдубут.
СӨ норуоттарын Ассамблеята уодаһыннаах дьаҥы бохсорго уонна этэҥҥэ чэгиэн, чөл олохпутугар төннө охсорго «Эһиги соҕотох буолбатаххыт» аахсыйаҕа кыттаргытыгар ыҥырар.