(Үөрүүлээх тэрээһин тырыбынатыгар салайааччы турар)
— Күндү доҕоттоор, бүгүҥҥү үөрүүлээх киэһэҕэ үбүлүөйдээх Уйбаан Бөтүрүөбүһү эҕэрдэлиэхпин баҕарабын!
— Баҕарар буоллаххына эҕэрдэлээ ээ, саараабакка-сэрбэҥнээбэккэ, “баҕарабын” буолан, баҕарабын да хайыыбын диэбиккэ дылы буолан түһэн… — диэн оҕонньор саалаҕа олорон муннун анныгар ботугураата, онуоха эмээхсинэ тоҥолоҕунан ойоҕоско аста.
— Оҕонньоор, дьон истиэ, ботугуруу олорума!
Салайааччы уһун, өрө көтөҕүллүүлээх эҕэрдэтин этэн, үбүлүөйдээх Уйбааҥҥа бэлэх туттарда, кини кэнниттэн Маарыйа Тэрэппиинэбинэ тырыбынаҕа тырыбыныйан тиийдэ:
— Бүгүҥҥү дьоро киэһэҕэ мустубут биир дойдулаахтарбын бука барыгытын ытыктыбыллаах Уйбаан Бөтүрүөбүс үбүлүөйдээх күнэ үүммүтүнэн ис-сүрэхпиттэн эҕэрдэлиэхпин баҕарабын!
— Ис сүрэххиттэн буоллаҕына саарбахтаабакка, чопчу быһаарынан кэллиҥ ини? Баҕарабын да хайыыбын, — диэн буолбатах буоллаҕа ээ (ойоҕо эмиэ ойоҕоско кэйдэ).
Үһүс киһи таҕыста;
— … эҕэрдэлиэхпин баҕарабын… — диирин кытта оҕонньор ботугуруон иннинэ, ойоҕоско кэбилиннэрии кэллэ, “ык” — диэҕэр диэри ходьох гына түстэ.
— Эмээхсиэн, ойоҕоһум көҕөрдө быһыылаах… (тэйэн биэрэр).
— Олох дьон бырааһынньыгар сатаан олоруо суохпут, дьиэлиибит дуо? (сэрэнэн ол-бу диэки көрүтэлиир).
— Хайа? Доҕорбун эҕэрдэлээбэккэ барабыт дуо? Сотору уочаратым кэлэр ини…
Уонча киһи эҕэрдэлиэн баҕарбытын, бэлэх туттарыан баҕарбытын, дьолу-соргуну, уһун үйэни баҕарыан баҕарбытын кэнниттэн биһиги оҕонньорбут эҕэрдэлиир уочарата кэллэ.
— Күндү доҕоттоор! Бу киэһэ култуурабыт дьиэтигэр мустан олорон, ытыктыыр Уйбаан Бөтүрүөбүспүтүн үбүлүөйдээх сааһынан эҕэрдэлиибит! Доҕорбун, атаспын, үөлээннээхпин нохтолоох тойон сүрэхпиттэн долгуйан туран ЭҔЭРДЭЛИИБИН!
Саала иһэ ытыс тыаһынан өрө хабылла түстэ, тоҕотун билбэккэ, олоччу өйдөөбөккө, кэлбит ыалдьыттар өрө тыынан, чэпчээбит, дьэгдьэйбит курдук буоллулар.
Наталья МОРДОВСКАЯ — Уйан КУТ.
Хаартыска: Галина Давыдова (СИАтан)