Эһээ Ленин пааматынньыгын саҥардан оҥоруу 2023 сылга түмүктэниэҕэ

Ааптар: 
Бөлөххө киир:

Бу нэдиэлэ ортотугар Бырабыыталыстыба 2 №-дээх дьиэтин утары олордуллубут сибэккилэри Ленин пааматынньыгын көтүрэр буолан, босхо биэртэлээбиттэрэ. Босхону босхо курдук дьон тута кэлэн ылбыттара,  сирин хара буорунан көрдөрбүттэрэ. 

Бүгүн Ленин пааматынньыгын көтүрэн эрэбит диэн ис хоһоонноох видео-устуу социальнай ситимнэринэн тарҕаммыта. Норуот, биллэн турар, «Эһээ Лениммитин, ама, көтүрбэттэр ини»,  «Ама хайаан көтүрдэхтэрэй, туруохтаах сиригэр турдун ээ», — диэн санаатын эппитэ.

Биллэн турар, пааматынньыгы көтүрэн баран бырахпаттар. Саҥардан оҥоруу икки түһүмэҕинэн ыытыллар. Бастакыта, 2022 сыл балаҕан ыйыгар диэри барар, иккис түһүмэх 2023 сыл ахсынньытыгар диэри. Билигин саҥардыы үлэтин бэлэмнээһин саҕаланна.

Бу туһунан СӨ судаарыстыбаннай тутуу уонна олорор дьиэ надзорун управлениетын салайааччы Павел Аргунов: «Бырайыак быһыытынан пааматынньык акылаата  (фундамена) уонна билиитэлэрэ уларытыллаллар, сибэкки кулуумбалара саҥардыллыахтара. Оттон скульптураны ыраастыахтара, алдьаныытын-кээһэниитин  оҥоруохтара»,  — диэн быһаарда.

Пааматынньыгы сарсын, от ыйын 8 күнүгэр, устуохтара, быстах кэмҥэ атын сиргэ ууруохтара.  Бу үлэни хантараак быһыытынан «Уран» дизайн-устуудьуйа ылбыта. Үлэ сыаната 20 мөл солк. Санатар буоллахха. паамытынньык 1967 сыллаахха туруоруллубут.

Онон Эһээ Ленин пааматынньыгын олох ылан, устан эрэллэр диэн долгуйбаккытыгар сүбэлиибит.  

Галина Мозолевская хаартыскаҕа түһэриитэ.

+1
0
+1
0
+1
0
+1
0
+1
0
+1
0
+1
0