Эһээ Дьыл: «Дьылы тахсан, күөххэ үктэммиппитинэн!»

Ааптар: 
Бөлөххө киир:

САХА САҤА СЫЛЫНАН, САМААН САЙЫН САҔАЛАММЫТЫНАН, ДЬЫЛЫ ТАХСАН, КҮӨХХЭ ҮКТЭММИППИТИНЭН КҮНДҮ САХАМ ДЬОНУГАР ИСТИҤ ЭҔЭРДЭ БУОЛЛУН!

Өбүгэлэрбит Саҥа сылы ыам ыйыгар кэлэр дииллэрэ, ол иһин ыам ыйа биһиэхэ бастакы, тохсунньу тохсус ый.

Фольклористар суруйалларынан, Саҥа сылы 10-ча хонук устата ыалтан ыалга сылдьан, бырааһынньыктыыр эбиттэр.

Православнайдар кэлэннэр Ньукуола Таҥара күнүгэр сөп түбэһиннэрэн, сайын ыам ыйын 22 күнүгэр саҕаланар диэбиттэр. Ону өбүгэлэрбит дьылы тахсан, күөххэ үктэнэн, сайыммыт саҕаланар күнэ диэннэр, Ньукуола таҥараны олус чугастык ылыммыттар. Ити үгэс билигин да салҕанан бара турар.

Ол иһин ыам ыйын 22 күнүн — Ньукуола күнүн ханнык да саха Саҥа сыла, Сайылык, Салгын күннэрэ өтөрүнэн солбуйуохтара суоҕа. Ону учуоттаан уонна православнай итэҕэл улахан бырааһынньыгын мэһэйдэспэт туһуттан, Саха Саҥа сылын Ыһыаҕын ыам ыйын бүтэһик быыһык күнүгэр ыытарга быһаарыллыбыта.

Ол иһин быйыл саха Саҥа сылын ыам ыйын 29 күнүгэр бырааһынньыктыырга былааннана сылдьыбыппыт да, дьаҥ ыарыыта элбээн, тохтуурга күһэлиннибит.

Айыы Тойон Таҥара бу кэмҥэ тыыннаах айылҕаны уонна саха киһитин айбыта. Ол улуу күнү Ийэ Айылҕабыт барахсан умнубат, уһун уутуттан уһуктан тиллэр, тыллар, ыллыыр-туойар, Айыы Тойон Таҥараны уруйдуур. Оттон саха аймах эмиэ Саха Саҥа сылын бырааһынньыктаан Айбыт Аҕа Таҥарабытыгар махталын биллэрэр, айыллыбыт, төрөөбүт күнүн ылар. «Санныбар өссө биир дьыл хаарын ууллардым» диэн сааһыгар биир сааһы эбинэр.

Биһиги ыам ыйын 22 күнүгэр ити улуу бэлиэ түгэннэри бары бииргэ мустан бырааһынньыктаабатахпыт да иһин, бу күн дьиэбитигэр уоппутугар олорон малааһыннаан, Айыы Тойон Таҥарабытыгар сахалыы кириэс охсунан туран, махтаныахтаахпыт. Аһыыр аспытын кириэс охсон айыы тыынын киллэрэн астына аһыахтаахпыт, сүүспүтүгэр хоруо, күл бистэн, сааспытыгар саас эбинэн, саҥа сааспыт
боруогун атыллаан, саҥа сааспыт, Саҥа сылбыт
дьоллоох эйгэтигэр киириэхтээхпит.

Барыта этэҥҥэ буоларыгар
Айыы Тойон Таҥара көмөлөстүн!
Тускуо!

Эһээ Дьыл.

+1
0
+1
0
+1
0
+1
0
+1
0
+1
0
+1
0