Дзюдоистка Аина Моисеева Арассыыйаҕа бастыыр иһин күрэхтэһиигэ чөмпүйүөннээтэ

Сэтинньи 21-27 күннэригэр Екатеринбурга 21 саастарыгар диэри спортсменнарга дзюдоҕа Арассыыйаҕа бастыыр иһин күрэхтэһии буола турар. 

Күрэхтэһии бастакы күнүгэр 48 киилэҕэ диэри ыйааһыҥҥа Дамдиндорж Гомбодорж тириэньэрдээх Аина Моисеева чөмпүйүөннээтэ. Аина биэстэ киирсээт, дойду кыһыл көмүс мэтээлин хаһаайкатынан иккис төгүлүн буолла. Кини финалга Рязантан сылдьар Марина Воробьеваны иппонунан кыайда.

Оттон Р.М.Дмитриев аатынан Олимпийскай Эрэллэр училищетын устудьуоҥката Сайыына Петрова биэс киирсииттэн түөрдүгэр кыайан, үрүҥ көмүс мэтээли ылан, Арассыыйа успуордун маастара уонна Арассыыйа 2022 сылга юниордарын сүүмэрдэммит хамаандатыгар киирэри ситистэ диэн sportyakutia.ru иһитиннэрэр.