Арассыыйа уонна Украина сыһыаннаһыыларыгар биир дойдулаахтарбыт, биллэр-көстөр салайааччылар санааларын үллэстэллэр. Төһө кыалларынан, түмсүөҕүҥ, оччоҕо этэҥҥэ буолуо дииллэр.
Джулустан Хон, «Якутлесресурс» ГАУ генеральнай дириэктэрэ:
— Украина националистара сыылла сылдьан сыарҕа быатын быһар идэни ылыммыттара номнуо аҕыс сыл ааста. НАТО арҕаа дойдулары Арассыыйаны утары кигэр. Эмиэрикэ Холбоһуктаах ыстааттара дьону булкуйар күүстээх информационнай үлэни ыытан кэллилэр.
Бу тухары Арассыыйа Украинаҕа сэрэтэр үлэни эрдэттэн ыыппыта. Билиҥҥи туругунан, анал эпэрээссийэ түмүктүүр биэтэгэр чугаһаан эрэр диэн көрөбүн. НАТО, Эмиэрикэ сааҥсыйалара толору киирэннэр, арҕаа дойдулар тэрилтэлэрэ Арассыыйаттан тахсар суолу тутустулар. Ырыынак босхолонно дии саныыбын. Бэйэбитин хааччыйар сыалтан тыа хаһаайыстыбатыгар оҥорон таһаарыыны күүскэ сайыннарар кэм бу тирээн кэллэ. Бары бииргэ түмсэн таһаарыылаахтык үлэлээтэхпитинэ, барыта этэҥҥэ буолуо диэн эрэнэбин. Биһиги күүспүт-уохпут түмсүүгэ сытарын өйдүөх тустаахпыт.