Ырыаһыт Джида быйыл эр дьон парикмахерскайын арыйда. Манна баттаҕы эрэ буолбакка, бытыгы кытта кырыйаллар, быһыылаан-таһаалаан биэрэллэр, маҥхайан эрэ баттаҕы кырааскалыыллар. Аҕа уолунаан кэлэн кырыйтардаҕына, чэпчэтии оҥоһуллар.
Эр киһи бэйэтин көрүнэ сылдьыахтаах, көҥүл санаалаах буолуохтаах диэн девиһи тутуһаллар. Аҥардас парикмахерскай иһигэр да киирдэххэ, эр дьоҥҥо анаммыта көстөр – дьиэ ис бараана, нууччалыы эттэххэ, “брутальнай” лофт истииллээх.
Соторутааҕыта Өрөспүүбүлүкэтээҕи кырдьаҕастар уонна инбэлииттэр интэринээт-дьиэлэригэр «Джентльмен-fresh» диэн аһымал аахсыйа ыыттылар. Ол эбэтэр бу манна олорор үс киһини ыҥыран, джентльмен уобараһын ылыналларыгар көмөлөстүлэр.
Виктор Барбахтыров, Николай Иванов уонна Яков Сидоров бу аахсыйаҕа кыттан, тас көрүҥнэрэ тосту уларыйан хаалла. Чахчыта, бэйэлэрин джентльмен курдук сананнахтара. Ол эрээри, Гоша Васильев-Джида этэринэн, киһи тас көрүҥэ уларыйдаҕына, ис дууһата эмиэ уларыйар, үтүөҕэ, кэрэҕэ тардыһыыта улаатар. Ким эрэ эйиэхэ ис санаатыттан көмөлөһөр, үтүөнү баҕарар буоллаҕына, сырдыкка тардыһарыҥ чуолкай.
Джентльменнары хаартыскаҕа түһэриинэн бу аахсыйа түмүктэннэ. Ол эрээри, Vostok_barberroom парикмахерскайга өссө да маннык аахсыйалар ыытыллыахтара диэн, хаһаайын этэр.
Урукку өттүгэр интэринээт-дьиэҕэ олорор кэрэ аҥаардарга эмиэ маннык аахсыйалар ыытылла сылдьыбыттара. Оттон бу түгэҥҥэ эр дьоҥҥо туһуланна. Ону тэҥэ, кэнники кэмҥэ ырыаһыттар бэйэлэрэ бизнес тэринэн, ситиһиилээхтик үлэлэтэллэр. Холобур, Варя Максима кэрэ сэбэрэ салонун, былаачыйалары уларсар тэрилтэни уонна фотостудияны арыйан үлэлэтэр, «Звезды Туймаады» сурунаалы таһаарар.
Ангелина Васильева, “Саха сирэ” хаһыат, edersaas.ru