Бу күннэргэ Виктор Рассадин уонна Егор Пономарев Россия сүүмэрдэммит хамаандатын үөрэтэр-эрчийэр түмсүүтүгэр бардылар.
Санатан эттэххэ, Аан дойду кубога олунньу 16-17 күннэригэр Иран Керманшах куоратыгар, оттон Европа чөмпүйэнээтэ ыам ыйын 2-7 күннэригэр Сербия Нови Сад куоратыгар ыытыллыахтара.
Россия көҥүл тустууга сүүмэрдэммит хамаандатын кылаабынай тренерэ Дзамболат Тедеев, Ярыгин турнирын кэннэ «кыайыылаахтар аан дойду кубогар кыттыахтара, итинтэн дьэ бэрэбиэркэлэнэн баран, Европа чөмпүйэнээтигэр кыттар састаап торумнаныа» диэн суруналыыстарга эппитэ.
-Саха бөҕөстөрө күрэхтэһии иннинэ 61 киилэҕэ бастыҥнарынан ааҕыллар этилэр. Ол эрээри, бу – спорт. Бэҕэһээ кинилэр кыайбыттара, оттон бүгүн – атыттар. Россияҕа курдук күүстээхтэр илин былдьаһыылара атын ханна да суох. Сабаҕалааһын быһыытынан, 5-6 тэҥ баайыылаах бөҕөстөн – биирдэстэрэ бастыан сөптөөҕө. Кинилэр улахан түһүлгэҕэ дойду чиэһин ситиһиилээхтик көмүскүүр кыахтаахтар.
Саха сирин тустууну таптааччылара санааларын түһэриэ суохтаахтар. Рассадиннаах Пономареву ким да ахсаантан бырахпат. Кинилэр сүүмэрдэммит хамаанда састаабыгар хаалаллар. Кылаабынайа эрэллэрин сүтэримиэхтэрин, салгыы өссө дьаныардаахтык үлэлиэхтэрин уонна бэйэлэрин иннилэригэр туруоруммут соруктарын эрдээхтик толоруохтарын наада.
Петр ПАВЛОВ, “Саха сирэ”, //edersaas.ru
Ааптар хаартыскаҕа түһэриитигэр: турнир кэнниттэн мунньах.