Таатта улууһугар, Боробул бөһүөлэгэр, Алампа аатынан норуот айымньытын дьиэтэ уонна М.А.Петров аатынан нэһилиэк бибилэтиэкэтэ Хомус күнүнэн эрдэттэн былааннаах үлэни тэрийэн ыыттылар. Бүгүҥҥү долгутуулаах тэрээһин туһунан Алампа аатынан норуот айымньытын дьиэтин дириэктэрэ Изабелла Жараева сырдатта.
— Хомус күнэ биһиги нэһилиэккэ олус көхтөөхтүк ыытылынна. Ол курдук, бүгүн нэһилиэкпит орто оскуолатыгар оҕолуун, улахан дьоннуун бука бары сахалыы сайбаччы таҥнан кэлэннэр, күргүөмүнэн хомустаатылар. Хомуска сахалыы матыыбы «Үрүччэ» фольклор бөлөҕүн кыттааччыта Радомир Чомчоев таһаарда. Бэһис кылаас үөрэнээччилэрэ «Хомус» ырыаны толорон дьиэрэттилэр. Ол кэнниттэн сомоҕолоһуу оһуохайа буолла. Оһуохайы СӨ үтүөлээх этээччитэ Иван Потапов таһаарда. Күүтүүлээх, долгутуулаах тэрээһиҥҥэ дьон-сэргэ сүргэлэрэ көтөҕүллэн үөрэ-көтө кытыннылар. Күргүөмүнэн хомуска уонна оһуохай түһүлгэтигэр дьиэ кэргэнинэн, кылааһынан, доҕотторгун-атастаргын кытта бүттүүн кыттар үчүгэйин, астыгын бэлиэтээтилэр.
Сардаана БАСНАЕВА, «Саха сирэ» хаһыат, edersaas.ru
+1
+1
+1
+1
+1
+1
+1