Быйыл Санкт-Петербурга Тыйаатыр сылын сүрүн тэрээһининэн ааттаммыт Бүтүн аан дойдутааҕы Театральнай олимпиада Арассыыйаҕа иккис төгүлүн бэс ыйын 15 күнүттэн саҕалаан сэтинньи ый бүтүөр диэри ыытыллар. Бу сыл олимпиада тэриллибитэ 25 үбүлүөйдээх сыла. Ол да иһин буолуо, олимпиада Арассыыйаҕа, Японияҕа тэҥинэн ыытыллар. Санкт-Петербурга уон биэс дойдуттан уонна Арассыыйаттан сэттэ национальнай тыйаатыр кыттыына ылар. Олоҥхо тыйаатыра ыҥырыллан, алтынньы 22-23 күннэригэр П.Ядрихинскай «Дьырыбына Дьырылыатта» олоҥхотун ситиһиилээхтик оонньоон кэллэ.
Театральнай олимпиада аан бастаан 1995 сыллаахха Греция Дельфа куоратыгар ыытыллыбыта. Онтон олимпиада араас сылларга Сидзуокига (Япония), Стамбулга (Турция), Сеулга (Соҕуруу Корея), Пекиҥҥэ (Кытай), Вроцлавка (Польша) уонна Индияҕа ыытыллыбыттара. 2001 сыллаахха Театральнай олимпиада Москваҕа буолбута. Онно сылдьан аан дойду тыйаатырдарын элбэҕи көрөн олимпиаданы сүрдээҕин сэҥээрбиппин өйдүүбүн. Италия, Франция, Япония, Аргентина, Болгария, Швейцария уо.д.а. дойдулартан кэлбит аар-саарга аатырбыт тыйаатырдары кытта билсибиппин күн бүгүҥҥэ диэри умнубаппын. Аҥардас Бартабас салайааччылаах «Зингаро» диэн аттар тыйаатырдара Францияттан кэлэн кыттыбыттара Москватааҕы олимпиада биир интэриэһинэй түгэнинэн буолбута.
«Дьырыбына Дьырылыатта» олоҥхо-испэктээги Саха Өрөспүүбүлүкэтин үтүөлээх артыыската Матрена Корнилова туруорбута. Хомойуох иһин, кини билигин биһиги кэккэбитигэр суох, ыарахан ыарыыттан быйыл олохтон барбыта.
Матрена Корнилова Олоҥхо тыйаатырыгар дьоһуннаах үлэни хаалларан барбыта аатын ааттата турарыттан биир идэлээхтэрэ, уһуйбут артыыстара долгуйа ахталлар. Ол курдук аан бастаан испэктээк 2018 сыллаах «Көмүс мааскаҕа» кыттыбыта. Бэстибээл кэнниттэн тыйаатыр биллэр кириитигэ Павел Руднев тыйаатыр эйгэтигэр сахалар саҥа хайысханы арыйбыттарын кыайан сыаналаабатыбыт, олоҥхо-испэктээкиллэри тыйаатыр саҥа көстүүтүн быһыытынан үөрэтиэххэ наада диэн суруйбутун сэргии аахпытым.
Олимпиада курдук улахан түһүлгэҕэ испэктээкили көрдөрүү, биллэн турар, кэскиллээх суол. Олоҥхо курдук сүдү айымньыбыт саха норуотун классическай тыйаатырынан ааттанан араас дойдуларга биллэн иһэрэ тыйаатыр сайдыытыгар улахан оруоллаах. «Дьырыбына Дьырылыатта» биһиги көрөөччүбүтүн сэргэ атын омуктар куттарын-сүрдэрин тардар күүстээх.
Надежда ОСИПОВА.
Хаартыска Санкт-Петербурга ыытыллыбыт Тыйаатыр олимпиадатын инстаграм-страницатыттан.
«Дьырыбына Дьырылыатта» олоҥхо Тыйаатыр олимпиадатыгар кыттыытын туһунан сиһилии
“Саха сирэ” хаһыат кэлэр нүөмэригэр ааҕаарыҥ.