Үөһээ Бүлүүгэ сэрии бэтэрээннэригэр анаан өйдөбүнньүк оҥороллор

Үөһээ Бүлүү улууһун Дүллүкү нэһилиэгэр Аҕа дойду сэриитин бэтэрээннэригэр анаан өйдөбүнньүк оҥоро сылдьаллар. Тутууну Кыайыы 75 сылын бырааһынньыгар бүтэрэр былааннаахтар диэн ТАСС иһитиннэрэр.

«Саҥа өйдөбүнньүк 1965 сыллаахха Кыайыы 20 сылыгар анаан оҥоһуллубут пааматынньыгы солбуйуоҕа. Сэрии, тыыл бэтэрээннэрин, сэриигэ өлбүт, сураҕа суох сүппүт дьон ааттарын саҥардан киллэриэхпит. Биһиги нэһилиэкпититтэн 252 киһи сэриигэ барбытыттан, дойдуларыгар 124 киһи эргиллибит«, — диэн баһылык Егор Николаев этэр.

Өйдөбүнньүгү нэһилиэк бүддьүөтүттэн уонна олохтоохтор өйөөннөр тута сылдьаллар. Билигин Дүллүкүгэ уон сэрии кэмин оҕото уонна сэттэ тыыл бэтэрээнэ уонна сэрии бэтэрээнин огдообото 102 сааһын туолаары сылдьар Елена Евдокимова олороллор.

edersaas.ru