Киһи олоҕун устатыгар умнуллубат өйдөбүллэри саҕар түгэннэр баар буолааччылар. Оннук түгэн миэхэ 63 сыл анараа өттүгэр Чурапчы Хадаарыттан үөрэххэ туттарса киирэ сылдьар кэммэр тосхойбута.
Оччолорго Каландаришвили-Белинскэй ааттарынан уулуссалар быһа охсуһар муннуктарыгар өрөспүүбүлүкэбит физкултуураҕа уонна спорка кэмитиэтэ үлэлиирэ. Кэмитиэт бэрэссэдээтэлэ Николай Николаевич Тарскай араас оройуоннартан кэлбит биэс оҕону кэбиниэтигэр ыҥыртаан сэһэргэспитэ.
Спорт министиэристибэтиттэн айаммыт харчытын бэрдэрэн, алҕаан, биһигини соҕуруу куораттарга үөрэххэ атаарбыта.
Аны кэлэн санаатахха, биһиги бары ол күн Николай Николаевичка биэрбит тылбытын чиэстээхтик толорбуппут. Степан Кириллин Саха АССР үтүөлээх учуутала, Николай Куличкин ССРС физическэй култууратын уонна спордун туйгуна, Иван Филиппов спорт маастара, Николай Ноговицын өрөспүүбүлүкэтээҕи категориялаах судьуйа буолбуттара. Онон биһиги үтүө дууһалаах Николай Николаевич Тарскайга махталбыт улахан.
Павел Харитонов,
XX үйэ бастыҥ тренерэ, Д.П.Коркин аатынан СӨ Госбириэмийэтин лауреата, Чурапчы оройуонун бочуоттаах гражданина.
Хаартыска: интэриниэттэн