Төрөөбүт тыл уонна сурук-бичик күнүгэр аналлаах дэкээдэ ХИФУ көхтөөхтүк ыытыллар.
Хотугулуу-Илиҥҥи норуоттар тылларын уонна култуураларын института тэрээһин иитинэн өрөспүүбүлүкэҕэ уонна куоракка сахалыы дьыктаан суруйуутун ыытар итиэннэ үрдүк үөрэх кыһатын иһинэн эбээннии, эбэҥкилии уонна дьүкээгирдии тылларынан суруйууну тэрийэр.
Дьыктаан тиэкиһин уус-уран айымньыттан ылаллар. Ол суруйуохха диэри кистэлэҥҥэ туталлар. Бу туһунан ХИФУ Хотугулуу-Илиҥҥи норуоттар тылларын уонна култуураларын институтун саха тылыгар хаапыдыратын сэбиэдиссэйэ Дарья Чиркоева эттэ.
«Сорудах тиэкиһин сыл ахсын биһиги институппут преподавателлэрэ бэлэмнииллэр. Өрөспүүбүлүкэ таһымыгар ыытыллар сахалыы дьыктааны суруйуу «Саха» НКИХ ханаалыгар быһа биэриигэ көстөр. Оттон куоракка дьыктааны суруйууну, 2014 сылтан Национальнай бибилэтиэкэлэри кытары бииргэ тэрийэн ыытабыт. Быйыл да бу тэрээһин үгэстийбит көрүҥүнэн ыытыллыа, ол гынан баран кыттааччыларын ахсаана хааччахтанар. Устудьуоннарга уонна ХИФУ үлэһиттэригэр сахалыы дьыктааны суруйуу пандемиянан сибээстээн уларыйан, теһи толоруу Google-диск нөҥүө ыытыллар«, — диэтэ кини. Маны сэргэ, олунньу 10-12 күннэригэр университекка устудьуоннар эбээн, эбэҥки, дьүкээгир тылларынан дьыктааны онлайн суруйуохтара.
«Дэкээдэ сыала — төрөөбүт тылы харыстааһын, киэҥник тарҕатыы уонна сайыннарыы. Биһиги сорукпут литературнай тылы сайыннарыы. Элбэх киһи сахалыы үчүгэйдик билэрин уонна ыраастык саҥарарын туһугар үлэлэһии, — диэтэ Дарья Чиркоева. – Институт бу сыалы ситиһэр туһугар тиһиктээхтик үлэлэһэр. Сүбэ-ама биэрэбит, педагогтары үөрэтэбит, уһуйааннары уонна оскуолалары кытары үлэлэһэбит, төрөөбүт тылы үөрэтэргэ босхо факультативтары тэрийэбит. Национальнай бибилэтиэкэни кытары кыттыһан, былырыын саха тылын үөрэтэр куурус аспыппыт«.
Дэкээдэ иитинэн университекка араас аахсыйалар, күөн күрэстэр, оонньуулар, көрсүһүүлэр ыытыллаллар. «Төрдүс сылын субуруччу ыытыллар «Өй күрэһэ» диэн билиини-көрүүнү тургутар оонньууну устудьуоннар олус сэҥээрэллэр, сэргииллэр. Бу оонньууну аан бастаан институт устудьуоннарыгар анаан тэрийбиппит, онтубут улахан болҕомтону тардан, былырыыҥҥыттан бүтүн университет кыттар оонньуута буолла. Быйыл оонньуу «Арассыыйа — мин устуоруйам» музейга ыытыллар, онно биэстии киһилээх биэс хамаанда кыттыахтаах«, — диэтэ Дарья Чиркоева.
+1
+1
+1
+1
+1
+1
+1