Ыам ыйын 25-26 күннэригэр Нам улууһугар «Дыгын оонньууларыгар» кыттарга биэс путевка иһин сүүмэрдиир түһүмэх ыытыллыаҕа диэн sportyakutia.ru саайт суруйар.
Билиҥҥи туругунан, «Дыгын оонньууларын» бастакы миэстэлээҕэ Егор Филиппов (Хаҥалас) уонна «Чөмпүйүөн Куубага» турнир кыайыылааҕа Дьулустаан Ноговицын (Горнай) путевкалаахтар. Егордаах Дьулустаан «Боотур» СК иитиллээччилэрэ буолаллар. Маны сэргэ бастакы сүүмэрдиир түһүмэх түмүгэр оонньууга кыттар быраабы Айсен БОТУЕВ (Үөһээ Бүлүү), Павел ДРУЗЬЯНОВ (Чурапчы), Владимир ФЕДОРОВ (Ньурба), Иннокентий КОЛЕСОВ (Кэбээйи) уонна Алексей УВАРОВСКАЙ (Кэбээйи) ылбыттара.
Намҥа тыҥааһыннаах илин-кэлин түсүһүү буолара күүтүллэр. Саха многоборьетын биллэр спортсменнара Петр Старостин, Артем Варданян, Николай Матаннанов, Алексей Иванов, Леонид Филиппов, Антон Тойтонов, Айсен Семенов, Давыд Колесов о.д.а. путевкалара суох.»Дыгын оонньууларын» финала Туймаада ыһыаҕын кэмигэр «Үс Хатыҥҥа» ыытыллыаҕа. Манна уопсайа 12 бөҕөс күрэхтэһиэҕэ.
Иккис сүүмэрдиир түһүмэххэ кыттыан баҕалаахтар ыам ыйын 23 күнүгэр диэри Дьокуускай к., Дзержинскэй уул. 5 №-дээх дьиэтигэр (Дьокуускай физическэй култуураҕа уонна спорка управлениета) сайаапката түһэриҥ. Б.т.: 34-10-05, электроннай аадырыс: sport_komitet@mail.ru
Иккис сүүмэрдиир түһүмэх бырагыраамата
Ыам ыйын 25 күнэ
09.00 – 10.00 –мандат хамыыһыйата, кыттааччылар сэрэбиэйдэһиилэрэ;
10.00 – 10.30 – хамаанда бэрэстэбиитэллэрэ кыттыылаах судьуйалар мунньахтара;
10.30 – 11.00 – күрэхтэһиини үөрүүлээхтик арыйыы;
11.00 – 13.00 – “Үс төгүл үс”;
13.00 – 14.00 – тохтобул;
14.00 – 16.30 – “Тутум эргиир”, мас тардыhыыта;
16.30 — 17.00 — бастакы күн түмүгүн таһаарыы.
Ыам ыйын 26 күнэ
09.30 – 10.00 – судьуйалар мунньахтара;
10.00 – 16.00 – оҕунан ытыы, 400 м сүүрүү, хапсаҕай, тааһы көтөҕүү;
16.00 – 16.30 – кыайыылаахтары наҕараадалааһын.
