«Дыгын» тыыннаах номохторо Иннокентий Макаров, Николай Дьяконов, Иван Белолюбскай
Бүгүн Дыгын оонньууларын кэмигэр урукку сылларга үстэ чөмпүйүөннээбит Иннокентий Макаровка, алтата чөмпүйүөннээбит Николай Дьяконовка, сэттэтэ чөмпүйүөннээбит Иван Белолюбскайга тэрийээччилэр кыһыл көмүс өйдөбүнньүк мэтээллэри туттардылар.
Кинилэр быйылгы оонньууга маннык сыанабылы биэрдилэр:
Иннокентий Макаров: «Ыччат сайдан иһэрэ олус үөрдэр. Уопсай бэлэмнэрин көрдөххө, Егор Филиппов бастыыр кыахтаах».
Николай Дьяконов: «Олус үчүгэй күрэхтэһии буола турар. Түгэнинэн туһанан, Сахам сирин олохтоохторугар ситиһиини, табыллыыны, доруобуйаны баҕарабын!».
Иван Белолюбскай: «Мин дьарыктыыр «Боотур» спорт-кулуубум уолаттара баҕа хоту кытта сылдьаллар. Былырыын эрдэттэн сыал-сорук туруорунан кыттыбытым. Билигин баҕа суох, барыта туолан, таһынан баран турар. Уолаттарбытыгар ситиһиини баҕарабын».
Оҕунан ытыы уонна 400 м. сүүрүү түмүгэ:
Билигин 14:30ч. балаһыанньанан, Егор Филиппов (Хаҥалас) бастаан иһэр, иккис — Николай Матаннанов (Таатта), үһүс — Айсен Ботуев (Үөһээ Бүлүү). Өссө хапсаҕай уонна таас көтөҕүү буолар. Кыттааччылар биир-икки очконан арыттаах иһэллэр, онон балаһыанньа тосту уларыйыан сөп.
Николай Попов, «Саха сирэ», edersaas.ru