«Дыгын оонньууларын» финалыгар өссө үс путевка оонньонуоҕа

Ааптар: 
Бөлөххө киир:

Бу нэдиэлэ өрөбүллэригэр, муус устар 24-25 күннэригэр, Дьокуускайга «Өрөгөй» успуорка бэлэмнэнии киинигэр «Дыгын оонньууларын» иккис сүүмэрдиир түһүмэҕэ ыытыллыаҕа. Тэрийээччилэр этэллэринэн, күрэхтэһии көрөөччүтэ суох уонна туох баар санитарнай нуорманы тутуһан ыытыллыаҕа. Итиэннэ кыттааччылар уонна судьуйалар күрэхтэһии иннинэ коронавирус дьаҥа суоҕун туоһулуур ыспыраапкалаах буолаллара ирдэнэр.

Многоборецтар хаалбыт үс путевка иһин илин-кэлин түсүһүөхтэрэ. «Дыгын оонньууларын» кыайыылааҕын аатын сайын Туймаада ыһыаҕын кэмигэр ыытыллар финалга билиэхпит.

Бүгүҥҥү күҥҥэ тоҕус боотур финалга кыттар бырааптаах: Леонид Филиппов (Амма), Вячеслав Дьяконов (Нам),  Дьулустаан Ноговицын (Горнай), Николай Матаннанов (Дьокуускай), Егор Филиппов (Хаҥалас), Тимофей Большаков (Сунтаар), Артем Варданян (Нам), Павел Друзьянов (Чурапчы), Владимир Федоров (Ньурба).

Иккис сүүмэрдиир түһүмэххэ сүүрбэччэ эр бэрдэ кыттара күүтүллэр. Кинилэр үгэс буолбут сэттэ көрүҥҥэ күрэхтэһиэхтэрэ: «Үс төгүл үс», «Тутум эргиир», мас-рестлинг, оҕунан ытыы,  400 миэтэрэҕэ сүүрүү, хапсаҕай уонна тааһы көтөҕүү.

+1
0
+1
0
+1
0
+1
0
+1
0
+1
0
+1
0