Маны аах Уопсастыба Успуорт

«Дыгын оонньуулара» ыытыллыахтара, ол эрэн…



Быйыл сайын «Туймаада ыһыаҕа-2021» коронавирус дьаҥынан сибээстээн, түһүлгэҕэ ыытыллыбатын туһунан иһитиннэрдилэр. Дьон-сэргэ унньуктаах уһун кыһыны быһа кэтэспит, өрөспүүбүлүкэ араас муннугуттан бастыҥтан бастыҥ эрчимнээх эр бэртэрэ, иҥиирдэрин мускуйан илин-кэлин түсүһэр күөн күрэстэрэ «Дыгын оонньуулара» Туймаада стадиоҥҥа  көрөөччүтэ суох ыытыллара көҥүллэннэ. Бу туһунан Дьокуускайдааҕы физическэй култуура уонна успуорт салалтатын салайааччыта Константин Бурцев бигэргэппитин туһунан «Спорт Якутии» иһитиннэрэр:

«Дыгын оонньуулара» саха төрүт оонньууларыгар элбэх көрүҥнээх күрэхтэһии кыайыылааҕын быһаарар түмүк көрсүһүү бэс ыйын 26-27 күннэригэр ыытыллыаҕа. Бу күннэргэ Роспотребнадзортан тэрээһини ыытыыга көҥүл ыллыбыт. Күрэхтэһии «Туймаада» стадион түһүлгэтигэр буолуоҕа. Күрэхтэһии, хомойуох иһин, көрөөччүтэ суох ыытыллыаҕа. Түмүктүүр күрэхтэһиигэ тахсыбыт уон икки кыттааччылары сэрэттибит, билигин салгыы дьарыктана сылдьаллар», — диэн Константин Бурцев иһитиннэрдэ.

Санатан эттэххэ, «Дыгын оонньууларын-2021» кыайыылааҕа – 1 000 000 солк. ылыаҕа. Иккис миэстэни ылбыт бөҕөс квадроцикл күлүүһүн тутуоҕа, үһүс бириистээх миэстэҕэ тахсыбыт мотоциклынан дьиэлиэҕэ.

«Дыгын оонньууларын-2021» күөн күрэһин кыттааччылара : Леонид Филиппов (Амма), Вячеслав Дьяконов (Нам), Дьулустаан Ноговицын (Горнай), Николай Матаннанов (Таатта), Егор Филиппов (Хаҥалас), Тимофей Большаков (Сунтаар), Артем Варданян (Нам), Владимир Федоров (Ньурба), Павел Друзьянов (Чурапчы), Дмитрий Петров (Бүлүү), Никита Новгородов (Уус Алдан), Айсен Елисеев (Дьокуускай),

Сыл биир саамай күүтүүлээх спортивнай күрэхтэһиитин «Спорт Якутии» Инстаграм ситимигэр быһа эпииринэн көрдөрөрүн туһунан биллэрдэ.

 

Надежда Ильина, edersaas.ru

Хаартыска СИА архыыбыттан

 

0
0