Өйүүҥҥүттэн — “Дыгын оонньуулара»!

Бөлөххө киир:

Аҕыйах сыллааҕыта ким эмэ ыһыах биир саамай күүтүүлээх күрэхтэһиитэ — «Дыгын оонньуулара» кыс ортото ыытыллыаҕа диэн эппитэ буоллар, тугу-тугу этэрий диэх этибит. Балаһыанньа маннык уларыйыылары киллэрбитэ өйдөнөр. Пандемиянан сибээстээн өр ыытыллыбакка турбут тэрээһин ахсынньы 5-6 күннэригэр «Триумф» спорт уораҕайыгар буолаары турар. Сүрүн бириис – биир мөлүйүөн солкуобай харчы.  

edersaas.ru

Үгэс быһыытынан, күрэхтэһиини Дьокуускай куорат дьаһалтата тэри­йэр. Муниципальнай тэриллии успуорка са­­лаатын начаалынньыга Константин Бурцев быйылгы сыл туох уратылааҕын кэпсээтэ:

Быйыл коронавирус туран, сайын ыһыах да, кү­рэх­тэһии да буолбатаҕа. «Дыгын оонньуулара» көһөрүллэн, дьэ, бу аҕы­йах хонугунан  буолаары турар. Бу күрэхтэһиини СӨ Ил Дархана Айсен Николаев, Роспотреб­надзор, Дьокуускай куорат дьаһалтата, национальнай многоборье феде­рациятын көҥүллэрин ылан ыытан эрэбит, — диэтэ Константин Семенович. — Икки күн устата уон түөрт бөҕөс илин-кэлин түсүһүө. Буоларын курдук, сэттэ көрүҥҥэ күрэхтэһиэхтэрэ: хапсаҕай, тутум эргиир, сүүрүү, үс төгүл үс, мас тардыһыы, оҕунан ытыы, таас көтөҕүү. Онон, быйылгы сыл улахан уратыта диэн суох. Арай, улахан сымара таас оннугар кумахтаах куулу көтөҕүөхтэрэ. «Триумф» дорожкатыгар, биллэн турар, таас көҥүллэммэт буоллаҕа. Оттон бэлэмнээбит куулбут 115 кг ыйааһын­наах буолуоҕа.

Быйылгы күрэхтэһиигэ сүүмэрдээһин буолбатаҕа. Былырыыҥҥы  оонньуулар уонна быйылгы национальнай многоборье күрэхтэһиитин рейтининэн күөн көрсөөччүлэри таллыбыт. Былырыыҥҥы фина­листар бары киирдилэр.

Өссө биир уратыбыт диэн, быйылгы күрэхтэһиигэ көрөөччүлэри киллэрбэппит. Ол оннугар, «Саха» НКИХ быһа биэриитигэр көрүөххүтүн сөп. Ону таһынан, youtube ханаалга Максим Тихонов устууларын  угуоҕа.

Бастакы миэстэлээх биир мөлү­йүөн солкуобайынан наҕараадаланыа. Иккис — “Буран”, үһүс миэстэлээх матасыыкыл ылыаҕа, — диэн Константин Семенович кэпсээтэ.

СҮРҮН БИРИИС –БИИР МӨЛҮЙҮӨН!

Быйылгы кыа­йыылаах, былырыыҥҥы курдук, эмиэ биир мөлүйүөнүнэн наҕараадаланыа. Санатар буоллахха, “Арктик капитал” тэрилтэ туруорбут былырыыҥҥы бирииһин кыайыылаах тахсыбыт Егор Филиппов ылбыта. Маннык элбэх сууманы былырыын тэрилтэ туруорбут ­буоллаҕына, быйылгы бирииһи чааһынай киһи туруорда. Алексей Пинигин – «Прогресс» тутуу хампаанньатын дириэктэрэ. Кини маннык кэпсээтэ:

Чурапчыттан төрүттээх киһи буоларым быһыытынан, успуорду сүрдээҕин сэҥээрэбин. Чурапчыга успуорт оскуолатыгар үөрэммитим, кыра эрдэхпиттэн успуорт эйгэтигэр улааппытым. Аҕам Семен Семенович Пинигин успуорт бэтэрээнэ, Чурапчы успуордун кэмитиэтин уонча сыл салайбыта. Абаҕам эмиэ Сойууска тыа сирин дуобатчыттарыгар иккис миэстэлээҕэ. Онон, успуорду сэҥээрэр буоламмын, ыччакка төһө кыалларынан көмөлөһө сатыыбын.

Чурапчыга ыытыллар «Тоҕус томтор» күрэхтэһиигэ эмиэ кыаҕым баарынан көмөлөһөбүн. Былырыын Егор Филиппов “Нива” массыынаны ылбыта. Иллэрээ сыл Рустам Ксенофонтов эмиэ “Нива” массыынаны ылан үөрбүтэ.

Буолаары турар күрэхтэһиигэ ким күүстээх, бэлэмнээх кыайдын!

Дьэ, быйылгы «Дыгын оонньуулара», кырдьык, күрэхтэһии устуоруйатыгар ураты. Аан дойдуну барытын аймаабыт пандемия усулуобуйатын учуоттаан, маннык ыытыллара сөптөөх дии саныыбын. Күрэхтэһээччилэргэ ситиһиини!

Петр Старостин, «Дыгын оонньууларын» 2014 сыллаах кыайыылааҕа:

Ыйааһына 82 кг, үрдүгэ 174  см, сааһа 32.

— Бу күрэхтэ­һиигэ бэлэмнэниибин хойутаан саҕалаабыт да буолларбын, син эрчиллэ, дьарыктана сатаатым. Тиһикпин быспакка сүүрдүм.

Успуорт эбийиэктэрэ сабыылаах буоланнар, табаарыһым “Idol Gym” тренажернай саалатыгар дьарыктанным. Билигин күүстээх дьарыкпын арыый кыччаттым.

Бу сырыыга оҕунан аҕыйахта ыттым. Уонна ортотунан, барытыгар бэлэмнээхпин диэххэ сөп. Үс иһигэр киирэрдии былааннанабын.

Биһиги бу кэпсэтиибит кэнниттэн, бүгүн, ол эбэтэр ахсынньы 3 күнүгэр, Петр эчэйиини ылбытын биллэрдилэр. Онон, күрэхтэһиигэ кыттарын тохтотор диэн буолла.  

Алексей Протодьяконов, мас тардыһыытыгар аан дойду чөмпүйүөнэ:

Ыйааһына 84 кг, үрдүгэ 185 см, сааһа 25.  

— Күрэхтэһиибит буолара-буолбата биллибэтэ эрэйдээх соҕус этэ.  Дьарыкпыт ноҕуруускатын хайдах аттарарбытын билбэккэ сылдьыбыппыт. Ол эрээри, дьарыкпын олоччу тохтоппотоҕум. Тириэньэрим суох.

Тутум эргииригэр ыарырҕатыахпын сөп, уон­нааҕыта  үчүгэй. Күрэхтэһии иннинэ үрүҥ аһы сии сатаабаппын. Ыксаллаах быһыы-майгы министиэристибэтигэр үлэлиибин.   Билигин уоппускаҕа сылдьар буоламмын, бэлэммин бэркэ түмүктээтим.

Былырыыҥҥы көрдөрүүлэрбин тупсарар былааннаахпын.

Леонид Филиппов, 2019 сыллаах Дыгын Оонньууларын үһүс миэстэлээҕэ.

Ыйааһына 77 кг, үрдүгэ 173 см, сааһа 30.

— Тириэньэрэ да суох буолларбын, дьарыгым былаан быһыытынан баран иһэр. Туругум үчүгэй. Билигин ноҕуруускабын аччаттым. Бары даҕаны күүспүтүн-уохпутун мунньунан киирэрбит буолуо. Сүүрүү, оҕунан ытыы, тутум  эргиир — сөбүлүүр көрүҥнэрим. Мас тардыһыыны, таас көтөҕүүнү ыарырҕатабын. Ол да буоллар, хас биирдии көрүҥҥэ 100% күүспүн-уохпун туһанар баҕа санаалаахпын.

+1
0
+1
0
+1
0
+1
0
+1
0
+1
0
+1
0