Сарсын – «Дыгын оонньуулара».Үгэскэ кубулуйбут күрэх сэҥээрээччилэрин, кэрэхсээччилэрин быйыл ким үөрдүөй? Биир мөлүйүөн солкуобай кылаан бириис кимиэхэ тиксиэҕэй? Сэрэбиэйинэн күрэҕи ким бастакынан саҕалыырый?
Ким кыайыай?
Үксүлэрбит тулуйбакка кэтэһэр-манаһар «Туймаада ыһыаҕын» кылаан тэрээһинигэр 8 улуус чулууттан-чулуу мадьынылара киин куоракка ыытыллыбыт үс түһүмэхтээх сүүмэрдээһин турнирын ааһан, билигин тиритиилээх-хорутуулаах, хара быар хамсааһыннаах, сүрэх өрүкүйүүлээх күрэххэ киирсиэхтэрэ. Быйыл улахан аакка-суолга тиксэрэр, дьон-сэргэ биһирэбилин, билиниитин биэрэр, нэһилиэктэр киэн туттар ыччатын түмэр, мадьынылар күөн көрсөр бүтэһик быһаарыылаах түһүлгэҕэ сүүмэрдээһини ааспыт 12 боотур күрэс былдьаһар.
Күрэх спортсменнарын ортолоругар Аан дойду уонна Арассыыйа чөмпүөйэннэрэ бааллар. Саамай саастаах кыттааччы бөҕөс — 34-тээх, оттон саамай эдэр саастааҕа — 20-лээх. Улуустарынан ыллахха, бу сылга иккилии, сорохторго үстүү бөҕөс улуустарын чиэһин көмүскүөхтэрэ, аатын ааттатыахтара, суон дурда, халыҥ хаахха буолуохтара. Холобур, Кэбээйи улууһуттан Артем Дьяконов, Яков Дмитриев уонна Алексей Уваровскай кытталлар. Үөһээ Бүлүү улууһуттан икки мадьыны Айсен Ботуев уонна Владимир Шологонов улуус чиэһин көмүскүөхтэрэ. Оттон Сунтаартан боотурдар Алексей Соколов уонна Тимофей Большаков киирсиэхтэрэ. Онон «Дыгын оонньууларыгар» бу улуустартан улахан дэлэгээссийэни кытта элбэх ыалдьыт кэлэрэ күүтүллэр. Успуорду сэҥэрээччилэр этэллэринэн, быйылгы оонньуулар кыайыылааҕынан 2022 сылга «Дыгын оонньуулара» кыайыылааҕа, 1999 с.т. Алексей Уваровскай буолара сабаҕаланар.
«Дыгын оонньууларын» кыттааччылара
Сэрэбиэйинэн күрэҕи ким бастакынан саҕалыырый?
Бөҕөстөр ортолоругар ыстаныыга сэрэбиэй быһыытынан Айсен Ботуев саҕалыаҕа, онон атын бөҕөстөр кинини баһыйарга кыһаллыахтара. Ол кэннэ Яков Дмитриевы кытары Айсен Ботуев тутум эргииргэ киирсиэхтэрэ. Национальнай многоборьеҕа Саха сирин чөмпүйүөнэ Борис Сдвижков сэрэбиэйинэн ити икки диссипилиинэҕэ түһүлгэҕэ бүтэһик тахсыаҕа. Оттон мас тардыһыыга Амма мадьынытын кытта Артем Дьяконов кытта бастакы киирсиэхтэрэ. Мас тардыһыы успуорт көрүҥэр фаворит, аан дойду икки төгүллээх чөмпүйүөнэ Дьулустаан Ноговицын Тимофей Большаковы кытта киирсиэҕэ.
Оҕунан ытыыга бастакы пааранан Артем Дьяконов уонна Алексей Сазонов тахсыахтара, бу успуорт көрүҥүн Владимир Шологонов уонна Алексей Соколов түмүктүөхтэрэ. 400 миэтэрэ уһуннаах сүүрүүгэ Алексей Сазонов бастакынан, ол кэннэ иккиһинэн Борис Сдвижков туруоҕа.
Сэрэбиэйинэн хапсаҕайга Борис Сдвижков уонна Артем Дьяконов киирсиэхтэрэ. Кинилэр кэннилэриттэн Алексей Соколов уонна Дьулустаан Ноговицын, оттон Николай Обоев Алексей Сазоновы кытта көбүөргэ тахсыаҕа. 2022 сылга «Дыгын оонньууларын» чөмпүйүөнэ Алексей Уваровскай Яков Дмитриевы кытта тустуохтара, Томпо оонньууларын кыайыылааҕа Павел Друзьянов Тимофей Большаковы кытта күөн көрсүөхтэрэ, түмүк пааранан Айсен Ботуев уонна Владимир Шологонов тахсыахтара.
Санаттахха, быйыл таас көтөҕөн ыраах хаамыыга сата тааһа 132 киилэ ыйааһыннаах буолуоҕа,бу успуорт көрүҥүн хапсаҕайга бастакынан тахсар мадьынылар саҕалыахтара.