Быйыл коронавирус дьаҥа туран, Туймаада ыһыаҕа онлайн киэбинэн буолбута. Онон, үгэскэ кубулуйбут “Дыгын оонньуулара” күрэхтэһии сатаан ыытыллыбатаҕа.
Бүгүн, сэтинньи 19 күнүгэр, “Тэтим” араадьыйа “Тайм-аут” биэриитигэр СӨ Успуорка уонна физическэй култуураҕа миниистирин солбуйааччы Семен Чердонов ыалдьыттаата. Семен Сергеевич “Дыгын оонньууларын” ахсынньы 5-6 күннэригэр Дьокуускйага “Триумф” успуорт коплексыгар ыытыллар былааннааҕын иһитиннэрдэ.
Оонньууларга, билиҥҥи туругунан, 2019 сыллаахха чөмпүйүөннэбит Хаҥаластан Егор Филиппов уонна сыл саҕаланыыта национальнай многоборьеҕа ыытыллыбыт чөмпүйэнээт кыайыылаахтара Ньурбаттан Владимир Федоров уонна Кэбээйиттэн Алексей Уваровскай путевкалаахтара биллэр. Өссө тоҕус кыттааччынан кимнээх буолаллара билиҥҥитэ биллибэт. Тэрийээччилэр сайаапка хомуйаллар.
Биллэр төрүөтүнэн, «Дыгын оонньуулара» көрөөччүлэрэ суох ыытыллар. Күрэхтэһиини «Саха» НКИХ ханаала быһа көрдөрүөҕэ.
Манна диэн эттэххэ, успуорду өрөспүүбүлүкэбитигэр киэҥник сырдатар «Спорт Якутии» саайт «Инстаграмҥа» баар страницатыгар «Дыгын оонньуулара» ахсынньы 5-6 күннэригэр ыытылларын туһунан иһитиннэрии уонна күрэхтэһии бигэргэммит балаһыанньата таҕыста.
edersaas.ru
СИА хаартыската.