Күүтүүлээх «Дыгын оонньууларын» түһүлгэтэ буолара биир хонук хаалла. Күрэхтэһээччилэр күүстээх дьарыгы ааһан, билигин санааларын сааһылана, күрэхтэһэр турукка киирэ сырыттахтара. Оттон дьон-сэргэ тыҥааһыннаах киирсиини араастаан билгэлээн көрөр. Ол иһин, «Дыгын оонньууларын» биирдии көрүҥүнэн лиидэрдэри талан көрдүбүт.
Үс төгүл үс
Бары билэрбит курдук, Егор Филиппов өрөспүүбүлүкэ бастыҥ ыстаныыга этэ. Элбэх киһи сабаҕалыырынан, кини 37,05 миэтэрэ ыстаммыт көрдөрүүтүн чугас сылларга ситэллэрэ саарбах. Егор Филиппов үс төгүл үскэ уһулуччу бастыҥ.
Тутум эргиир
Кэнники сылларга тутум эргиир көрдөрүүтэ олус тубуста. Рекорд үрдүгэр рекорд туруоруллар. Быйыл иккис сүүмэрдиир түһүмэххэ Айсен Ботуев 64-тэ эргийэн, өрөспүүбүлүкэ рекордун олохтообута. Оттон былырыыҥҥы «Дыгын оонньуларыгар» тутум эргииргэ 60 эргиири оҥорон бастаабыт Алексей Иванов көрдөрүүтүн эмиэ лаппа тупсарыан сөп. Ол иһин, бу көрүҥҥэ Алексей Иванов уонна Айсен Ботуев иккиэн лиидэрдэр.
Мас тардыһыыта
Быйылгы «Дыгын оонньуларыгар» мас тардыһыыктар иккиэлэр эрэ. Ол курдук, Артем Варданян уонна Борис Сдвижков. Артем Варданян 80 киилэҕэ диэри өрөспүүбүлүкэ уонна Арассыыйа чөмпүйэнээтин иккис призера буолар. Оттон Николай Матаннанов «Чөмпүйүөн кубогар» мас тардыһыытыгар лаппа эбиллибитин көрдөрбүтэ. Борис Сдвижков улахан уолаттарга ыйааһынынан сабырыйтарыан сөп.
Оҕунан ытыы
Оҕунан ытыыга былырыын 59 очукуону ытан «Дыгын оонньууларыгар» 2016 сыллаахха туруорбут рекордун тупсарбыт Егор Филиппов мөккүөрэ суох лиидэр буолар. Бу көрүҥҥэ кинини Леонид Филиппов сахалыы оҕунан ытан кыайан турардаах. Ол эрэн, Леонид «Чөмпүйүөн кубогар» илиитигэр эчэйии ылан, быйыл кыттыбата.
400 миэтэрэҕэ сүүрүү
400 миэтэрэҕэ өрөспүүбүлүкэ рекордун туруора сылдьыбыт Петр Старостин Чурапчыга ыытыллыбыт «Тоҕус Томтор» многоборье күрэхтэһиигэ атаҕар эчэйии ылан, быйылгы «Дыгын оонньууларыгар» кыттара биллибэт. Кинини былырыын сүүрүүгэ Артем Варданян уонна Леонид Филиппов ситэн турардаахтар. Маны таһынан, дыгын түһүлгэтигэр бастакытын кыттар Борис Сдвижков 400 миэтэрэҕэ үчүгэйдик сүүрэрин иккис сүүмэрдиир түһүмэххэ уонна да атын күрэхтэһиилэргэ көрдөрөн турар. Ол иһин, быйылгы «Дыгын оонньууларын» сүүрүүтүгэр Артем Варданян уонна Борис Сдвижков бастыҥнар.
Хапсаҕай
Хапсаҕай- халбас харата, туох баҕар буолуон сөп диэн саха норуотугар этии баар. Бу көрүҥҥэ арыт ардыгар «киһи үөйбэтэх өттүттэн» хамсаныылар тахсааччылар. Лиидэрдэри хапсаҕайга сыһыана суох уолаттар сөпкө хамсанан сууллуран кэбиһээччилэр. Быйылгы «Дыгын оонньууларыгар» хапсаҕайга күүскэ эрчиллэр уолаттар Антон Тойтонов уонна Владимир Федоров инники күөҥҥэ сылдьыахтарын сөп. Былырыыҥҥы чөмпүйүөн Егор Филиппов хапсаҕайга эбиллибитин «Чөмпүйүөн кубогар» хапсаҕайга бастакы буолан көрдөрбүтэ. Былырыыҥҥы «Дыгыҥҥа» Артем Варданян Алексей Козловтуун финалга киһи биһириир киирсиитин көрдөрбүтэ. Оттон Петр Старостин эчэйиитинэн «Дыгын оонньууларыгар» кыттыбат түгэнигэр, иккис сүүмэрдиир түһүмэххэ алтыс буолбут Мэҥэ Хаҥаластан Давыд Колесов кыттар. Кини икки сүүмэрдиир түһүмэххэ хапсаҕайга бастаабыта. «Дыгын оонньууларыгар» кыттар түгэнигэр, лиидэрдэр истэригэр киирэр.
Таас көтөҕүүтэ
116 киилэлээх сымара тааһы былырыын Горнай боотура Дьулустан Ноговицын 203 м 50 см илдьэн рекорд олохтообута. Дьулустаан быйыл «Дыгын оонньууларыгар» кыттыбат. Былырыын үчүгэй көрдөрүүлээх Егор Филиппов уонна Артем Варданян бу көрүҥҥэ туох баар кыахтарын ууран бардахтарына тааһы ыраах илдьиэхтэрин сөп.
Илья Скрябин, Дыгын оонньууларын өр кэмнээҕи комментатора:
— Егор Филиппов ыстаныыга эрчиллэ сылдьан икки төгүл «Дыгын оонньууларыгар» чөмпүйүөннээбит буоллаҕына, быйыл анаан многоборьеҕа дьарыктанна. Кыһын ыытыллыбыт Уйбаан Белолюбскай бирииһигэр»Чөмпүйүөн кубога» күрэхтэһиигэ хапсаҕайа хайдах курдук тупсубутун бары көрбүппүт. Эбиитин үс төгүллээх чөмпүйүөн буолар баҕата кинини кыайыыга угуйар. Санаата мэһэйдээбэтэҕинэ, Егор Филиппов чөмпүйүөннүөҕэ. Сыл аайы сайдан иһэр Артем Варданян күүстээх утарсыыны оҥороро чуолкай. Былырыын үрдүк үөрэҕи бүтэрэр дипломнай үлэтин суруйа сылдьан эрчиллэн иккис буолбута. Быйыл баһаарнай чааска үлэҕэ киирэн, эрчиллэр бириэмэтэ элбээбитин бэйэтэ да бэлиэтээбитэ. Егор Филипповка сүрүн утарсааччы Артем Варданян. Николай Матаннановы хайаан даҕаны бэлиэтиибин. Кини күрэхтэһии аайы көрдөрүүлэрин тупсаран иһэр. Бу сырыыга инники да таҕыстаҕына соһуйом суоҕа. Быйылгы «Дыгыҥҥа» элбэх эдэр уол кыттара олус үчүгэй. Кинилэр биирдиилээн көрүҥҥэ бэйэлэрин чаҕылхайдык көрдөрөн, миэстэ былдьаһыытыгар лиидэрдэргэ мэһэйдэһиэхтэрин сөп. Эдэр уолаттар сылтан сыл сайдан иһэллэр. Эдэр саастарыттан анаан многоборьенан эрчиллибит уолаттар кэлэр сылларга уһулуччу буолуохтара.
Уопсай түмүккэ, дьон улахан аҥаара Егор Филиппов кыайыа дииллэр. Ол эрэн, многоборье элбэх көрүҥтэн турар буолан, кыайыылааҕы билгэлиир ыарахан. Күрэхтэһээччилэр бэйэлэрэ этэллэрин курдук — «Түһүлгэ көрдөрүөҕэ»!
Николай ПОПОВ, «Саха сирэ» хаһыат, edersaas.ru