Ахсынньы 5-6 күннэригэр Дьокуускайга «Триумф» успуорт комплексыгар «Дыгын оонньуулара» турнир ыытыллар буолла диэн бу нэдиэлэҕэ иһитиннэрбиттэрэ.
Күрэхтэһии бырагыраамата уларыйбат. Ол курдук, ыстаҥаҕа, тутум эргииригэр, мас тардыһыыга, оҕунан ытыыга, хапсаҕайга, сүүрүүгэ уонна тааһы көтөҕүүгэ спортсменнар илин-кэлин түһүөхтэрэ. Турнир көрөөччүтэ суох ыытыллар, быһа биэриини «Саха» НКИХ ханаала көрдөрүөҕэ.
Ааспыт сылларга «Дыгын оонньууларыгар» сүүмэрдиир түһүмэхтэр ыытыллан путевкалар оонньонооччулар. Быйыл биллэр төрүөтүнэн бу ыытыллыбата. Быраабыла быһыытынан, бүтэһик оонньуулары кыайбыт Хаҥаластан Егор Филиппов уонна национальнай многоборье чөмпүйэнээтин кыайыылаахтара Кэбээйиттэн Алексей Уваровскай, Ньурбаттан Владимир Федоров быһа кыттар бырааптаахтар.
Оттон өрөспүүбүлүкэ национальнай многоборьеҕа федерацията биллэрбитинэн, бу үс үөһээ ааттаммыт боотуру сэргэ Артем Варданян (Нам), Леонид Филиппов (Амма), Павел Друзьянов (Чурапчы), Алексей Протодьяконов (Томпо), Дьулустан Ноговицын (Горнай), Николай Матаннанов (Таатта), Айсен Семенов (Өлөөн), Никита Новгородов (Уус Алдан) уонна Егор Свинобоев (Мэҥэ Хаҥалас) күрэхтэһэр буоллулар.
edersaas.ru
СИА хаартыската.