Бу күннэргэ айылҕаттан айдарыылаах, сайдыы-билии бары өттүгэр дэгиттэр үрдүк чыпчааллары ситиспит, инникини өтө көрбүт саха омук уһулуччулаах уола Платон Алексеевич Слепцов-Ойуунускай төрөөбүтэ 125 сылын туолуутугар өрөспүүбүлүкэҕэ араас өрүттээх тэрээһиннэр ыытыллаллар.
edersaas.ru
Сэтинньи 8 күнүгэр А.Е. Кулаковскай аатынан норуоттар доҕордоһууларын дьиэтигэр “Бочуот Знага” уордьан кавалера, ССРС культуратын туйгуна, СӨ культуратын үтүөлээх үлэһитэ Дмитрий Дмитриевич Тихонов “Мин аатым ааттаныа, мин ырыам ылланыа” диэн киэҥ бырагыраамалаах сүдү кэнсиэри ис дууһатыттан иһирэхтик-истиҥник толорон көрөөччүлэригэр, сүгүрүйээччилэригэр бэлэхтээтэ. Кэнсиэр икки чаастаах: бастакынан, улуу Былатыан Ойуунускай норуотун уһуктуутугар, саҥа олоҕу айымньылаахтык тутууну саҕалаабытыгар, инники кэскилигэр анаан суруйбут аҕыс айымньытынан СӨ культуратын үтүөлээх деятелэ, композитор Александр Самойлов вокальнай поэма-кантата Д.Д. Тихонов баритон куолаһыгар ананан суруллубут курдук уустук айымньыны көрөөччүлэр биир тыынынан истэн дуоһуйдулар. Ырыаһыт киэҥ диапазоннаах сөҥ куолаһа, хас биирдии ырыа тыллара чуолкайдык иһиллэрэ ордук астыннарда, дириҥ ис хоһоонун көрөөччүлэргэ тиэрдэргэ көмөлөстө.
Кэнсиэр иккис чааһыгар саха литературатын чаҕылхай поэттара, суруйааччылара А. Кулаковскай, А. Софронов, П. Ойуунускай, Эллэй, Амма Аччыгыйа, С. Омоллоон, Макар Хара, В. Тарабукин, Урсун тылларыгар, саха төрүт кылыһахтаах матыыбын музыкаҕа түһэрэн, композитордар, мелодистар В. Ксенофонтов, А. Скрябин, Г. Григорян, В. Зырянов, Х. Максимов уо.д.а. саха саарыннарын, дьикти кэрэ айылҕатын, кэрэ дьону үөскэппит, маанылаах Тааттаны хоһуйбут хоһоонноругар уостан түспэт ырыаларыттан ситии курдук тиһэн-таҥан толорбута ааспыты санатта, эдэрдэргэ эҕэрдэ буолан иһилиннэ. Бу кэнсиэри ордук С.А. Зверев-Кыыл Уола аатынан Үҥкүү национальнай театрын СӨ культуратын үтүөлээх деятелэ Николай Петров салайааччылаах оркестрын тыыннаах музыкатын доҕуһуола, Мэҥэ Хаҥалас “Кыталык” народнай ансаамбыла, А. Давыдова балетмейстердаах сахалыы үҥкүүлэр, Таатта Күөрэгэйэ Елена Старостина ырыата тупсардылар, киэргэттилэр. Дмитрий Тихонов сахалар биир киэн туттар ырыаһыппыт, Саха сирин историятын үбүлүөйдээх түгэннэригэр анаан 100-нэн кэнсиэрдэри, киэҥ репертуардаах бырагыраамалары бэлэмнээн оҥорон, айан-сырыы эндирдэрин аахсыбакка, ситиһиилээхтик толорон, көрөөччүлэри үөрдэр, астыннарар. Билигин төрөөбүт дойдубутун атыйахтаах уу курдук аймаабыт Аан дойду сэриитигэр өрөгөйдөөх Кыайыы 75 сылын көрсө 200 кэнсиэри бэлэмнииргэ уонна толорорго олус уустук уонна эппиэтинэстээх былааны ылынан үлэтин саҕалаабыт. Д.Д. Тихоновы СӨ народнай, РСФСР үтүөлээх артыыската Феврония Баишева: “… ырыаһыт быһыытынан тустаах үөрэҕи барбатаҕа буолан баран, айылҕаттан бэриллибит талаанынан истээччи дууһатын долгутар, ис киирбэх тембрдээх, дьоһуннаах баритон куоластаах”, Суорун Омоллоон аатынан опера уонна балет театрын хорун кылаабынай хормейстера, СӨ культуратын үтүөлээх деятелэ О.С. Птицына: “Кини ырыаһыт быһыытынан сүрүн уратытынан саха композитордарын уонна мелодистарын саҥа ырыаларын үөрэтэн дьоҥҥо-сэргэҕэ тиэрдиитэ буолар” диэн үрдүк сыанабылы биэрбиттэрэ.
Дмитрий Тихонов инники айар үлэтигэр ситиһиилэри баҕарабыт уонна кини кэнсиэригэр элбэх истээччилэри көтүппэккэ сылдьаргытыгар ыҥырабыт.
Хаартыска: А.Е. Кулаковскай аатынан КК саайтыттан.
СӨ культуратын туйгуна Екатерина Белоногова, СӨ культуратын үтүөлээх үлэһитэ Тамара Слепцова