Бүгүн, ахсынньы 4 күнүгэр, Дьокуускайга Өксөкүлээх Өлөксөй аатынан культура киинигэр Дуолан Трофимов айар кэнсиэрэ үрдүк таһымнаахтык ааста.
Ирдэбил быһыытынан ыйыллыбыт миэстэлэргэ икки кэнсиэркэ билиэт барыта атыыланан, олус истиҥник, үрдүк таһымнаах кэнсиэр ааста. Дуоланы бары «Кулунчук», «Сахам ата» ырыаларынан көрөөччү бары ылынар ырыаһыппыт буолар. Куолаһа да мааны, ырыатын да толоруулара көрөөччүнү тарта. Репертуарыгар дэгэрэҥ ырыалары сэргэ лирическэй матыыптаах ырыалара олус истиҥнэр. Сиппит-хоппут артыыс быһыытынан ханна да тиийэн кэнсиэртиир, үрдүк таһымнаах ырыаһыт буола үүммүт диэн астынныбыт. «Хотойдор кыырайа көтөллөр» диэн ыллыырыныы, үрдүк таһымҥа тахсыбытын сэргээтибит. Онон Дуолан аатынан сүрэхтэнэн айар кэнсиэрин көрөөччү биһирээтэ.
Дуолан айар кэнсиэригэр Элгээйитээҕи музоскуола иһинэн тэриллибит «Домисольки» Москваҕа 2007 сыллаахха «Евровидениеҕа «кыттыбыт оҕолорбут улаатан, араас идэни баһылаан, Дуолан кэнсиэригэр кыттан, көрөөччүнү сэргэхситтилэр. Дуолан кэнсиэригэр сүүрэ-көтө, айар киэһэтин кынаттаабыт учууталыгар Мария Сергеевна Семеноваҕа улахан махталы көрөөччү быһыытынан этэбин. Кэнсиэргэ кини хас да сыл эрчийбит оҕолоро хайдах курдук Элгэйилэрин, Сунтаарбыт улууһун аатыртылар. Саха норуотун культуратын сайдыытыгар, чуолаан ырыаҕа Мария Сергеевна үлэтинэн киэн туттабыт. Онон бу кэнсиэр Дуолан уонна учуутал айар талааннарын өрөгөйүн көрөн астынныбыт. Дуолан ахсым аккынан көрөөччүгүн үөрдэ сырыт!
Марта Николаева, Дьокуускай