Атырдьах ыйын 1-9 күннэригэр Польша киин куоратыгар Варшаваҕа сүүс харахтаах дуобакка кыргыттар уонна уолаттар Европаҕа биирдиилээн бастыыр иһин күрэхтэһиилэрэ ыытыллан түмүктэннэ. Күрэхтэһии классическай, түргэн уонна чаҕылҕанныы түргэн оонньууларга тэрилиннэ.
Өрөспүүбүлүкэтээҕи Дуобат уонна саахымат киинин инструктора, Бүтүн Арассыыйатааҕы категориялаах судьуйа Гаврил Петрович Винокуров биһиэхэ иһитиннэрбитинэн, бастаан классическай оонньуу ыытыллыбытыгар, 2009 сыллаахха диэри төрөөбүттэргэ – Лиза Васильева уонна Айтал Софронов (иккиэн – ДЮСШ-5) үһүс миэстэлэри ыллылар. Оттон 2006-2008 сс. төрөөбүттэргэ Сандаара Апросимова уонна Айаал Бушуев – бастакы, Сайаана Наумова иккис миэстэлэргэ таҕыстылар. Кинилэр үһүөн өрөспүүбүлүкэтээҕи Дуобат-саахымат киинин иитиллээччилэрэ. 2005-2003 сыллаахтарга Алена Большакова (Дьокуускай) тэҥнээҕин булбата. Оттон 2002-2000 сыллаахтарга Толя Протодьяконов (ДЮСШ-5) бастакы, Аля Большакова (Дьокуускай) үһүс миэстэлэннилэр.
Түргэн оонньууга 2006-2008 сыллаахтарга Алексей Большаков (өрөспүүбүлүкэтээҕи Дуобат-саахымат киинэ) бастакы, Сандаара Апросимова уонна Айсен Егоров (Хаҥалас) үһүс буоллулар. 2005-2003 сс. төрөөбүттэргэ Тунаара Федорова (өрөспүүбүлүкэтээҕи Дуобат-саахымат киинэ) иккис, Алена Большакова үһүс миэстэлэри ыллылар.
Күрэхтэһии үһүс, чаҕылҕанныы оонньуутугар Сандаара Апросимова уонна Тунаара Федорова бастакы, Алексей Большаков иккис, Лиза Васильева уонна Аля Большакова үһүс миэстэлэннилэр.
Онон, өрөспүүбүлүкэҕэ спорт көрүҥнэриттэн барытыттан өрүү саамай элбэх мэтээли аҕалар дуобатчыттар, бу да сырыыга үрдүк ситиһиилэннилэр.
Петр ПАВЛОВ.