Дуобатчыт оҕолорбут Европа күрэхтэһиитигэр сэттэ кыһыл көмүс мэтээли ыллылар

Вильнюс куоракка (Литва) ыытыллыбыт сүүс харахтаах дуобакка Европаҕа бастыыр иһин күрэхтэһиигэ Арассыыйа, Белоруссия, Латвия, Литва, Нидерланды, Азербайджан, Польша, Эстония, Украина, Чехия, Турция, Италия, Венгрия, Франция эдэр спортсменнара кытыннылар. Континент бастыҥнарын кытта Саха сирин уон икки эдэр дуобатчыта күрэс былдьаста.

Оҕолорбут бу күрэхтэһиигэ биэс бөлөхтөн үһүгэр – 10-гар, 13-гэр уонна 16-гар диэри саастаахтарга кыттан, барыта уон биэс мэтээли, ол иһигэр сэттэ кыһыл көмүһү ылары ситистилэр.

Манна Хаҥаластааҕы оҕо спортивнай оскуолатын иитиллээччитэ Айсен Егоров тахсыылаахтык оонньоото. Кини бэйэтин бөлөҕөр классическай (80 мүнүүтэ) уонна түргэн оонньууга (15 мүнүүтэ) тэҥнээҕин булбата, оттон 5 мүнүүтэлээх оонньууга иккис буолла. Манна даҕатан эттэххэ, Айсен нуучча дуобатыгар Европаҕа бастыыр иһин күрэхтэһиигэ үс көрүҥҥэ бастаан турардаах.

Өрөспүүбүлүкэтээҕи дуобат-саахымат киинин спортсменнара Тунаара Федорова уонна Сандаара Апросимова икки көрүҥҥэ бастакы миэстэни бэйэлэрин икки ардыларыгар быһаарыстылар. Манна кыайыылааҕынан Тунаара буолла. Оттон Сандаара Белоруссияттан сылдьар Виктория Николаеваны кытта көрсүһүүтэ күрэхтэһии бастыҥ матчынан буолла. Биэс аҥар чаас устата барбыт күрэскэ саха дуобатчыта кыайыылаах таҕыста.

Бу ситиһиилэринэн оҕолорбут саха дуобакка оскуолата Арассыыйаны ааһан, Европаҕа кытары инники күөҥҥэ сылдьарын өссө биирдэ итэҕэттилэр.

Роман Попов

Хаартыска Интэриниэттэн ылылынна.

Сүүс харахтаах дуобакка Европаҕа бастыыр иһин күрэхтэһии

Вильнюс, атырдьах ыйын 1-9 күннэрэ.

Классическай бырагыраамаҕа:

10-гар диэри саастаахтарга:
1 миэстэ – Егоров Айсен, Хаҥалас улууһа
3 миэстэ – Алексеева Дайаана, ӨДСК, Дьокуускай

13-гэр диэри саастаахтарга:
1 миэстэ – Федорова Тунаара, ӨДСК, Дьокуускай

2 миэстэ – Апросимова Сандаара, ӨДСК, Дьокуускай

Түргэн бырагыраамаҕа:

10-гар диэри саастаахтарга:
1 миэстэ – Егоров Айсен, Хаҥалас улууһа
3 миэстэ – Никанорова Юлия, ОАДь, Дьокуускай, РСДЮСШ филиала, Нам

13-гэр диэри саастаахтарга:
3 миэстэ – Апросимова Сандаара, ӨДСК, Дьокуускай

16-гар диэри саастаахтарга:
1 миэстэ – Кычкина Елена, ДЮСШ-5, Дьокуускай

Чаҕылыс бырагыраамаҕа:

10-гар диэри саастаахтарга:
2 миэстэ – Егоров Айсен, Хангаласский район
1 миэстэ – Алексеева Дайаана, ӨДСК, Дьокуускай
2 миэстэ – Никанорова Юлия, ОАДь, Дьокуускай, РСДЮСШ филиала, Нам

13-гэр диэри саастаахтарга:
1 миэстэ – Федорова Тунаара, ӨДСК, Дьокуускай
2 миэстэ – Апросимова Сандаара, ӨДСК, Дьокуускай

16-гар диэри саастаахтарга:
1 миэстэ – Большакова Алена, ДЮСШ-5, Дьокуускай
2 мисэтэ – Кычкина Елена, ДЮСШ-5, Дьокуускай