Саха дуобатчыттара Арассыыйа сүүмэрдэммит хамаандатыгар киирэн, дуобакка аан дойду чөмпүйэнээтигэр кытыннылар. Күрэхтэһии Турция Кушадасы куоратыгар алтынньы 14-23 күннэригэр ыытылынна.
Күрэхтэһии үс дисциплинаҕа ыытылынна: түргэн, чаҕылханныы уонна классическай бырагырааманан.
Дьахталларга түргэн дуобакка бастакы уонна иккис миэстэни саха кыргыттара гроссмейстер Матрена Ноговицына уонна Наталья Шестакова ыллылар.
Чаҕылханныы оонньууга үс кыайыылаахтан иккитэ Саха сирин дуобатчыттара буоллулар. Ол курдук, гроссмейстердар Николай Стручков уонна Николай Гуляев иккис уонна үһүс миэстэни ыллылар. Манна кыайыылааҕынан украинец Сергей Белошеев буолла. Итиэннэ Николай Гуляев түргэн оонньууга боруонса мэтээл хаһаайынынан буолла.
Чөмпүйэнээт сүрүн бырагырааматыгар, 64 харахтаах классическай дуобакка, Амма улууһун Болугуруттан сылдьар норуоттар икки ардыларынааҕы гроссмейстер Андрей Федотов кыайыы көтөллөнөн, аан дойду чөмпүйүөнэ буолла. Андрей финалга аан дойду уон төгүллээх чөмпүйүөнүн Александр Георгиевы кыайда. Бу иннинэ 2018 сыллаахха Амма дуобатчыта бастакытын аан дойду чөмпүйүөнэ буолары ситиспитэ. Кини тириэньэринэн биллэр ааттаах-суоллаах дуобатчыт Гаврил Колесов буолар.
Бу чөмпүйэнээттэн дуобатчыттарбыт икки кыһыл көмүс, икки үрүҥ көмүс уонна биир боруонса мэтээллэнилэр.
edersaas.ru