Маны аах Уопсастыба

Дуобакка дьиэ кэргэн турнира ыытылынна

Бэҕэһээ, ыам ыйын 22 күнүгэр (Ньукуолаҕа),  Дьокуускайга Ф.И.Авдеева аатынан  Оҕо айымньытын дыбарыаһын “Дуобат” студиятын Саха АССР төрүттэммитэ 100 сылыгар аналлаах турнира үрдүк тэрээһиннээхтик буолан ааста.   Турнирга оҕолору кытта төрөппүттэр эмиэ кытыннылар. Барыта 36 хамаанда  саастарынан үс бөлөххө арахсан, сэттэ туурга оонньоотулар (бастакы бөлөх 2015-2016 с.т., иккис бөлөх 2013-2014 с.т уонна үһүс 2012-2009 с.т.).

Турнир сарсыарда 10 чаастан саҕаланан улахан эрийсиилээх киирсии кэнниттэн  эбиэт иннинэ аҕай түмүктэннэ. Ханнык баҕарар күрэхтэһии кыайааччылаах буоларын быһыытынан түмүгү таһаарыы буолла. Үрдүк ситиһиилэммиттэр анал дипломнарынан, Кубогынан уонна мэтээлинэн наҕараадаланнылар.   “Дуобат” студиятыгар турнир үөрэх дьылын түмүктүүр тэрээһин быһыытынан ыытылынна. Ол курдук, сыл устата  дуобат уустук садаачатын элбэҕи суоттаабыттар, сыл устата онлайн хабааннаах турнирдарга көхтөөхтүк уонна ситиһиилээхтик кыттыбыттар туспа номинацияланан наҕараадалананнар үөрүүлэрэ-көтүүлэрэ муҥура суох буолла.

Турнир биир сүрүн тэрийээччитэ, биллэр тириэньэр Акулина Беляева: «Сылын аайы  түмүктүүр турниры ыытабын. Өссө сылга иккитэ тэрийээччибин. Үөрэх дьыла  түмүктэниитэ муҥутуур чөмпүйүөннэри быһаарабыт. Биир эрэ сыл быһаарбакка хаалбыппыт.  2009 сылтан муҥутуур чөмпүйүөннэрин быһааран кэллибит. Түмүктүүр турнир оннугар быйыл дьиэ кэргэн күрэхтэһиитин ыыттыбыт. Ол аата оҕону кытта төрөппүттэрэ эбэтэр бырааттара, убайдара, эдьийдэрэ, эбэлэрэ, эһэлэрэ кытталлар. Биир курдук тэрээһини ыытарга төрөппүттэр күүс-көмө буолаллар.  Кыттыбыт төрөппүттэргэ, чуолаан төрөппүттэр кэмитиэттэрин чилиэннэригэр  ис сүрэхпиттэн махтанабын. Самаан сайыммыт салаллан кэлбитинэн ис сүрэхпиттэн эҕэрдэлиибин!» — диэн санаатын үллэһиннэ.

 

 

 

 

 

0
0
Telegram @edersaas20