Уус Алдаҥҥа буола турар Оонньуларга саамай чыыннаах-хааннаах киирсээччилэрдээх көрүҥүнэн туох да саарбаҕа суох дуобат буолар. Манна 11 гроссмейстер, 20-тэн тахса аан дойду чөмпүйүөнэ күөн көрсө кэлбиттэр. Бороҕоҥҥо Күлүмнүүр аатынан Култуура киинигэр Арассыыйа чөмпүйэнээтин куоһарар таһымнаах киирсии буола турар.
Маҥнайгы күн түмүктэринэн туспа “сенсация” буолла. Күүстээх састааптаах аммалар хамаандалара Уус Алдан хамаандатыгар үс 64 харахтаах дуоскаҕа, икки 100 харахтаах дуоскаҕа хоттордулар. Манна элбэх сабыдыал оонньоото. Бастатан туран, оонньуур кэм кылгатыллыбыта ордук күүстээхтэри атыттар таһымнарыгар биллэрдик чугаһатта. Иккиһинэн, дуобатчыт сынньанар усулуобуйата күннээҕи оонньуур таһымыгар эмиэ дьайар. Онон ыраахтан айаннаан кэлэн, уопсай дьиэҕэ хоммут күрэхтэһээччи иннигэр олохтоох, дьиэтигэр утуйан сынньаммыт оонньооччу балай эмит улахан куоһурдаах буолуон сөп. Ону таһынан судьуйа Гаврил Винокуров этэринэн, очукуо ааҕыыта билигин арыый атыннаах, онон билиҥҥи көрдөрүү омос көрдөххө эрэ улахан арыттаах курдук. 9 оонньууттан 4-дүн эрэ кээрэттилэр, түмүккэ уларыйыы лаппа атын буолуон сөп. Аммалар хамаандаларыгар үс аан дойду чөмпүйүөнэ баар: Алексей Федотов, Николай Гуляев, Аина Карпова (устудьуоннарга аан дойду чөмпүйүөнэ). Ол эрээри, Уус Алдан хамаандатын таһымын эмиэ мөлтөҕүнэн ааттыыр сыыһа: классическай дуобакка аан дойду чөмпүйүөнэ Николай Гермогенов, 100 харахтаах дуобакка ыччакка аан дойду кыайыылааҕа Анатолий Протодьяконов бааллар
Билиҥҥи туругунан дуобакка уонна саахымакка намнар бастаан иһэллэр. Күүстээхтэринэн Дьокуускай, Амма, Нам, Чурапчы хаамаандалара буолаллар. Ол эрээри, «дьол хараҕа суох» диэн баар, ханнык хамаандалар үс бочуоттаах миэстэни ылалларын билгэлиир эрдэ.