“Дьулуур”, “Өркөн”, “Аартык”… Маҕараска түөлбэнэн куоластыыллар.
Горнай улууһун Маҕарастааҕы 182 N-дээх быыбардыыр учаастагар РФ Төрүт сокуонугар уларытыылары киллэрэргэ куоластааһын бэс ыйын 25 күнүттэн саҕаланан, дьон, эрдэттэн оҥоһуллубут графигынан, түөлбэлэринэн кэлэн, бүгүн үһүс күнүн куоластыы сылдьаллар.
Түөлбэнэн куоластааһын, элбэх дьон биир кэмҥэ тоҕуоруспакка, дистанцияны тутуһарын ситиһэр сыалтан оҥоһуллар. Хас биирдии киһи температурата мээрэйдэнэр, киниэхэ мааска, бэрчээкки, уруучука бэриллэр.
Ол курдук, икки бастакы күн “Дьулуур” түөлбэ куоластаата, бүгүн-сарсын, бэс ыйын 27-28 күннэригэр “Өркөн” түөлбэ дьоно бэйэлэрин гражданскай иэстэрин толороллор. Итинник, бэс ыйын 30 күнүгэр диэри “Аартык”, “Айтал” түөлбэлэр дьонноро куоластыахтара. От ыйын 1 күнүгэр бары олохтоохтор уонна түөлбэнэн куоластааһыҥҥа кыайан кэлбэтэхтэр кэлэн куоластыахтара.
— Икки күн туругунан 135 киһи куолаастаата. Быыбар хамыыһыйата 6 киһилээх, итиэннэ 4 волонтёр көмөлөһөр, 14 наблюдатель баар. Хамыыһыйа чилиэннэрэ “Улуу Сыһыы” учаастагар баран кэллилэр. Манна Никифоровтар дьиэ кэргэн бааһынай хаһаайыстыбата сүөһү, сылгы иитиитинэн дьарыктанар. 4 быыбардааччы баар. Оттон дьиэҕэ куоластааһыҥҥа 32 киһи сайабылыанньа биэрбититтэн, билиҥҥитэ 11 киһи куоластаата, — диэн иһитиннэрдэ биһиэхэ Дьахтар сэбиэтиттэн уопсастыбаннай кэтээн көрөөччү, “Айтал” түөлбэ салайааччыта Жоржетта ТЕКЕЯНОВА.
Одуну нэһилиэгэр уопсайа 500 быыбардааччы баар, бэҕэһээҥҥи туругунан 135 киһи куоластаабыт.
Татьяна МАРКОВА, «Саха сирэ» хаһыат, edersaas.ru