«Дьулуур» киинэ бэс ыйын 2 күнүттэн Арассыыйа киинэ тыйаатырдарыгар көстүөҕэ
Валентин Макаров режиссердаах «Дьулуур: мас-рестлинг» киинэ бэс ыйын 2 күнүттэн Арассыыйа отучча куоратыгар көстүөҕэ. Мас тардыһыы туһунан бастакы улахан киинэҕэ сүрүн оруолу Олоҥхо тыйаатырын артыыһа Гаврил Менкяров итэҕэтиилээхтик толордо. Бэҕэһээ, ыам ыйын 24 күнүгэр, саҥа киинэни суруналыыстарга, артыыстарга, устар бөлөххө көрдөрдүлэр.
Киинэҕэ аармыйа кэнниттэн төрөөбүт дойдутугар эргиллибит эдэр уол Дьулуур Гоголев туһунан көстөр. Кини балтытын Күннэйи кытта бииргэ буолар туһуттан араас кыһалҕалары ааһарын киинэ бастакы көрөөччүлэрэ сэҥээрэн көрдүлэр. Мустубут дьоҥҥо режиссер Валентин Макаров: «Киинэбитин икки сылтан тахса кэм устата санаабытын ууран туран оҥордубут. Олус долгуйабыт», — диэн санаатын эттэ. Оттон СӨ вице-премьера Сергей Местников мас-рестлиҥҥэ аан дойду чөмпүйэнээтин иннинэ бу киинэ көстөрө өссө долгутуулаах диэн бэлиэтээтэ.
Киинэни оҥорооччуларга, артыыстарга бэйэлэрин эҕэрдэлэрин, махтал тылларын Ил Түмэн дьокутаата, сис кэмитиэт бэрэссэдээтэлэ Феодосия Габышева, спорт миниистирэ Леонид Спиридонов тиэртилэр. Леонид Спиридонов Гаврил Менкяровка тардыһар маһы утары ууммута олус тоҕоостоох буолла. Феодосия Габышева Ил Дархан этиитинэн киинэни оҥорооччуларга туспа сокуон барыла бэлэмнэнэ сылдьарын кэпсээтэ.
Киинэ туһунан биллэр мадьыны, «Дыгын оонньууларын» сэттэ төгүллээх чөмпүйүөнэ Уйбаан Белолюбскай санаатын үллэстэр:
Киинэни Мэҥэ Хаҥаласка, Аммаҕа уонна Дьокуускайга устубуттар. Эпизодтарга биллэр-көстөр мадьынылар бааллара, күрэхтэһии ураты тыынын аҕалла.
Бэлиэтээн суруйдахха, «Дьулуур» киинэ араас бэстибээллэргэ кыттан, дьүүллүүр сүбэ уонна кириитиктэр биһирэбиллэрин ылбыта. Ол курдук, Тобольскайга ыытыллыбыт «Алафейская гора» бэстибээлгэ «Эр киһи бастыҥ оруола» уонна «Режиссер бастыҥ үлэтэ» номинацияларга кыайбыта.
Киинэ трейлерэ:
«Саха сирэ» хаһыат бу чэппиэрдээҕи нүөмэригэр саҥа киинэ режиссера Валентин Макаров улахан интервьютун ааҕаарыҥ.
Мария Васильева (СИА) хаартыскалара.