Бу күннэргэ Тобольскайга буолбут «Алефийская гора» киинэ бэстибээлигэр режиссер, артыыс Валентин Макаров «Дьулуур» киинэтэ икки улахан наҕараадаҕа тигистэ. Бу киинэҕэ мадьыны оруолун толорор Олоҥхо тыйаатырын артыыһа Гаврил Менкяров «Эр киһи бастыҥ оруола» аакка тигистэ.
Валентин Макаров, киинэ режиссера:
— Бэҕэһээ батсаап ситимигэр продюсеркай киин генеральнай дириэктэрэ Филипп Абрютин миэхэ киинэбит кыайда диэн эҕэрдэлээбитин соһуйа аахтым. Мин олус соһуйдум да, үөрдүм да. Аҕыйах хонуктааҕыта тыйаатырга олордохпуна эҕэрдэ видеота устан ыыт диэбиттэрэ. Бу киинэни биһиги наһаа бүөбэйдээн, харыстаан, бириинчиктээн аҕай оҥордубут. Киинэбитин бэс ыйын 2 күнүгэр бүтүн Арассыыйа үрдүнэн таһааран көрдөрүөхпүтүн баҕарабыт. Киинэҕэ үлэлэспит, оруолларга оонньообут артыыстарга махталбын биллэрэбин.
Гаврил Менкяров, Олоҥхо тыйаатырын артыыһа:
— Киинэҕэ бэйэм эппинэн-хааммынан оонньоон көрдөрбүт оруолум буолан, хайа эрэ өрүтэ миэхэ чугас, дьүөрэлии. Артыыс буоларым быһыытынан, бэйэбиттэн атын оруолу оҥоро сатаабытым. Бу оруолбун режиссер Валентин Макаровтыын сүбэлэһэммит, киһибитин кэлэҕэй гына көрдөрбүппүт. Оонньообут оруолум миигиттэн уратыта — мас тардыһыы көрүҥэр ситиһиилэнэн миигиттэн улааппыта көстөр. Арай сиэрэ-майгыта, өйө-санаата майгынныыр. Мин чопчу ханнык эрэ оруолу оонньуохпун баҕарбаппын. Арай, олоҥхону ордук дириҥник үөрэтэн, соҕотоҕун бу улуу айымньыны толоруохпун баҕарабын. Ити олоҥхо тыйаатырын артыыһа буоларым быһыытынан, бу миэхэ чыпчаал буолуоҕа. Олоҥхо туспа матыыптаах, дорҕоонноох, элбэх оруоллаах. Ону барытын биир артыыс толороро үрдүк чыпчаал диэн сыаналыыбын уонна онно дьулуһабын. Киинэбит Тобольскайга ситиһиилэммит, ол аата үлэбит, сырабыт сыаналаммыт буоллаҕа диэн сэмэйдик үөрэбин.
Ульяна Захарова.