Суорун Омоллоон аатынан Опера уонна балет тыйаатыра ахсынньы 6 күнүгэр “Ньургун Боотур” операны Москваҕа көрдөрүөҕэ. Композитор Марк Жирков “Дьулуруйар Ньургун Боотур” оператыгар 220 артыыс: опера сүрүн солистара, балет бөлөҕө, хор уонна симфоническай оркестр кыттар.
edersaas.ru
САССР тэриллибитэ 100 сылынан туруоруллар опера Улахан тыйаатырга туруон иннинэ тиэхиньиичэскэй эрэпэтииссийэ буолуоҕа уонна декорациялары туруоруохтара. Бэлэмнэниигэ Арассыыйа музыкальнай тыйаатырдарын исписэлиистэрин айар бөлөҕө кыттар. Кинилэр ортолоругар туруорааччы-дирижер — Москва опереттатын кылаабынай дирижера Константин Хватынец, туруорааччы-режиссер — тыйаатыр уус-уран салайааччыта Сергей Юнганс, туруорааччы-худуоһунньук Михаил Егоров, көстүүмнэр худуоһунньуктара Сардана Федотова бааллар.
Быһаарыы:
«Дьулуруйар Ньургун Боотур» — Опера уонна балет тыйаатырын устуоруйатыгар төрдүс туруоруу. “Дьулуруйар Ньургун Боотур” көрөөччүгэ аан бастаан 1955 сыллаахха Дьокуускайга, онтон 1957 сыллаахха Москваҕа Саха сирин литературатын уонна ускуустубатын декадатын чэрчитинэн көрдөрүллүбүтэ.
Надежда ЕГОРОВА, «Саха сирэ» хаһыат, edersaas.ru