Ыраас, сырдык ыралаах, ыллам-сайдам майгылаах, дьулҕан дьулуурдаах, дьоһун дьоҕурдаах ыччаты көрдөххө, киһи үөрэр, ол туһунан кэпсиэн-ипсиэн баҕарар.
Хомойуох иһин, бэл, тыа сиригэр, сорох ыччат үлэ суох диэн ааттаан таах олороро мэлдьэх буолбатах. Ол да иһин, үлэтэ суох ахсаана аҕыйаан биэрбэт. Биһиги көлүөнэ бииргэ үөрэммит оскуолатааҕы доҕорбут, үөлээннээхпит бастакынан Горнай улууһун Маҕаны нэһилиэгэр бааһынай хаһаайыстыбатын тэриммит Николай Федотович Семенов бу нэһилиэк кыыһын ылан, элбэх оҕолоох, күндү күтүөт буолан олорор.
Оҕо эрдэҕиттэн барыга бары сыстаҕас этэ. Бастыҥ байаныыс, умсугутар уруһуйдьут.
Күндү ааҕааччым, олус халыйаары гынным. Уонча сыллааҕыта Николай Федотович улахан уола Ньургун биһиги нэһилиэкпит эмиэ биир биллэр киһитин Иван Андреевич Васильев кыра кыыһын Ньургустаананы кэргэн ылан, күтүөт буолан кэлбитэ. Элбэх оҕолоох ыаллар оҕолоро холбоһоот, үлэлээн-хамсаан барбыттара. Ол түмүгэр, билигин алта оҕолоох ньир-бааччы ыаллар.
Ньургун тиэхиньикэҕэ сыһыаннааҕа, дьулуурдааҕа, хайа да үлэттэн толлон турбата олус туһалыыр. Онуоха эбии аҕатын бааһынай хаһаайыстыбатыгар оҕо эрдэҕиттэн эриллибитэ көмөлөспүт буолуохтаах.
Ньургун тырахтарыыс. Суоппар идэлээх. Кэлин сылларга саҥа пилорама атыылаһан, мас кэрдэн, эрбэтэн, чугас дьонун абырыыр аҕай. Быыһыгар олохтоохтору Солоҕон — Бэрдьигэстээх-Дьокуускай эбэтэр Солоҕон-Бэрдьигэстээх — Маҕаны туһаайыыларынан таһан, үп-харчы киллэринэр.
Тутууга да лаппа сыһыаннааҕа, ый иһигэр үс-түөрт араас мааркалаах тиэхиньикэ киирэр гарааһын суос соҕотоҕун тутан дьэндэтэн кэбиспитэ дакаастыыр дии саныыбын.
Эрчимнээх эдэр киһи ыраас ырата, баҕарар баҕата баһаам. Ол туһунан суруйары саха үгэһинэн тохтотон эриэҕиҥ. Арай, биири этиэхпин баҕарабын. Хайа да үлэттэн чаҕыйбат, булугас өйдөөх күндү күтүөппүтүгэр эрэлбит улахан.
Александр Тарасов, нэһилиэк сэбиэтин дьокутаата, бочуоттаах олохтооҕо.
Хаартыска: СИА